Йил бошидан бери уюшган жиноий гуруҳларнинг юздан ортиқ аъзолари ушланди
Уларнинг 42 нафари муқаддам судланган бўлса, 34 нафари жанговар спортчилар ҳисобланади.
2026 йил бошидан бери тезкор тадбирлар натижасида 22 та йирик уюшган жиноий гуруҳ фаолиятига чек қўйилиб, уларнинг 29 нафар гуруҳ етакчиси (шундан 6 нафари хорижий давлатларда ушланиб, Ўзбекистонга олиб келинди) ва 101 нафар аъзоси қўлга олинган.
Шундан 2 таси трансмиллий, 8 таси вилоятлараро уюшган гуруҳлар ҳисобланади. Ушланган уюшган гуруҳлар 44 та шаҳар-туманда ўз жиноий қилмишларни содир этган.
Улар тадбиркорлар фаолиятига тўсқинлик қилиб, фуқаролар ўртасидаги олди-берди муносабатларида фаол иштирок этиб ҳамда оғир ва ўта оғир жиноятларни содир қилиб келган. Хусусан, 18 та талончилик, 17 та оғир тан жароҳат етказиш, 16 та безорилик, 6 та товламатчилик ва бошқалар.
Ушбу жиноий гуруҳларнинг таркибини асосан муқаддам судланган (42 нафар) ҳамда спортнинг жанговар тури билан шуғулланувчи шахслар (34 нафар) ташкил этмоқда.
