Россия Эрондан 632 кишини эвакуация қилди
Улар орасида уч нафар Ўзбекистон фуқароси ҳам бор.
Россия Эрондан 632 кишини, жумладан, Ўзбекистон, Беларус, Тожикистон, Қозоғистон ва Украина фуқароларини эвакуация қилди.
Бу ҳақда Россиянинг Исфаҳондаги бош консули Андрей Жилцов РИА "Новости" агентлигига маълум қилди.
"Шиддатли бомбардимон ва ракета ҳужумлари шароитида хорижий ваколатхоналар ходимлари Россия элчихонаси кўмагида тўртта эвакуация рейслари орқали жанговар зонадан 632 кишини уюшган ва хавфсиз эвакуация қилишни таъминладилар", деди дипломат.
Унинг таъкидлашича, Бушеҳр атом электр станцияси ходимлари, жумладан, Беларус (81), Тожикистон (27), Арманистон (4), Ўзбекистон (3) ва Қозоғистон ва Украинадан биттадан фуқаро, Россия элчихонаси, Исфаҳондаги Россия бош консуллиги ходимлари оила аъзолари ҳам эвакуация қилинган.
Бош консулнинг сўзларига кўра, 2024 йил апрел ойида Эрон расмийлари томонидан ҳибсга олинган MSS Adier контейнер кемаси ва MT ADARA танкеридан тўққиз денгизчи ҳам эвакуация қилинган.
