Шавкат Мирзиёев Алишер Усмоновга миннатдорлик билдирди
Бу ҳақда Президентнинг Ислом цивилизацияси марказининг расмий очилиш маросимидаги нутқида таъкидланган.
Президент Шавкат Мирзиёев Алишер Усмоновга миннатдорлик билдирди.
Бу ҳақда Президентнинг Ўзбекистондаги Ислом цивилизацияси марказининг расмий очилиш маросимидаги нутқида айтилади.
"Бундай йирик ва мураккаб маданий иншоотни қуришда ҳомийлик ёрдамини кўрсатган маҳаллий ва чет эллик тадбиркорлар, маданият ва спорт намояндаларига алоҳида раҳмат айтаман. Хусусан, биринчилар қаторида ташаббус кўрсатиб, зарур маблағ, ғоя ва ноёб тарихий экспонатлар тақдим этгани учун ҳурматли ватандошимиз, машҳур меценат ва бизнесмен Алишер Бурҳонович Усмоновга самимий ташаккур изҳор этаман", дейилади нутқда.
Ушбу Марказда Ўзбекистоннинг қадимий тарихи ва цивилизацияси дурдоналарини бир пайтнинг ўзида ягона маърифий маконда кўриш, шу асосда ўзбек халқининг интеллектуал ва маданий салоҳиятини яққол англаш мумкин. Ушбу ноёб мажмуа салкам 10 гектар ҳудудда жойлашган бўлиб, бинонинг умумий фойдаланиш майдони 50 минг квадрат метрни ташкил этади. Бу ерда “Ўзбекистон заминида исломгача бўлган давр”, “Биринчи ва Иккинчи Ренессанс”, “Янги Ўзбекистон – Учинчи Ренессанс пойдевори” каби экспозиция заллари мавжуд.
Музей экспозициясини шакллантириш ва бойитиш бўйича ҳам катта ишлар қилинди. Ўтган йилнинг ўзида 1,5 мингдан ортиқ экспонат, жумладан, 800 га яқин қадимий қўлёзма, археологик топилма ва тарихий хариталар экспозицияга жойлаштирилгани ҳам шундан далолат беради.
Айни вақтда хорижий аукцион уйлари, йирик коллекционер ва арт дилерлар билан ҳамкорлик ўрнатилиб, 743 та экспонатнинг оригинал, яъни, асл нусхалари юртимизга келтирилди.
