Эрон президенти урушни тугатишнинг шартларини айтди
Бунинг учун Эронга товон пули тўланиши ва хавфсизлик кафолатлари тақдим этилиши лозим.
Эрон президенти Маъсуд Пезешкиён тинчлик шарти ҳақида гапирди.
"Яқин Шарқда тинчликка эришиш учун Эронга товон пули тўланиши ва хавфсизлик кафолатланиши керак", деб ёзди Пезешкиён ижтимоий тармоқлардаги саҳифасида.
"Сионист режим ва Қўшма Штатлар томонидан бошланган бу урушни тугатишнинг ягона йўли Эроннинг қонуний ҳуқуқларини тан олиш, товон пули тўлаш ва келажакдаги тажовузга қарши қатъий халқаро кафолатлар беришдир", деди у.
Пезешкиён Россия президенти Владимир Путин ва Покистон президенти Осиф Али Зардарий билан суҳбатлашганини ва Эроннинг минтақада тинчликка содиқлигини яна бир бор тасдиқлаганини айтди.
Аввалроқ АҚШ Эронга қарши урушнинг икки кунида ўқ-дориларга 5,6 млрд доллар сарфлагани айтилганди.
Трамп маъмурияти яқин кунларда Конгрессга ҳарбий кампанияни қўллаб-қувватлаш учун "ўнлаб миллиард доллар" сўраб сўров юбориши мумкин.
