Трамп Эронга қарши яна уруш бошланиши мумкинлигини айтди
У бу ҳақда Флоридадаги сайловолди йиғинида гапирди ва Эронни келишувга чақирди.
АҚШ президенти Доналд Трамп Эронга қарши янги операция ўтказилишини истисно қилмади. У бу ҳақда Флоридадаги сайловолди йиғинида маълум қилди, деб хабар беради Channel Seven телеканали.
"Биз яна бир кичик "Эпик ғазаб"ни бошлашимиз мумкин. Ёки улар (АҚШ билан келишувга) рози бўлишлари мумкин", деди Трамп.
Америка етакчиси АҚШнинг иккита операциясини эслади: ядровий иншоотларга ҳужум қилган "Midnight Hammer" ва 28 февраль куни Исроил билан биргаликда Ислом Республикасига амалга оширилган "Эпик ғазаб" уруши.
Маъмурият операция тугаганини 5 май куни эълон қилди.
АҚШ президентининг сўзларига кўра, Теҳрон келишувга рози бўлиши керак.
"Агар улар (Эрон расмийлари – таҳр.) ақлли бўлсалар, "Келинг, ишга киришайлик", дейишади", деди Трамп.
Айни пайтда, Эрон парламентининг Миллий хавфсизлик ва ташқи сиёсат қўмитаси аъзоси Феда-Ҳусейн Малики Теҳрон Исломобод меморандумини амалга оширишга қайтса, Қўшма Штатлар билан музокараларни кўриб чиқишга тайёрлигини билдирди.
"Айтганимдек, Эрон ҳар қандай музокараларни бошлаш учун меморандумга риоя қилишни шарт қилиб қўяди... Музокараларга келсак, агар америкаликлар меморандумни амалга оширишга қайтсалар, биз бу масалани ўрганиб чиқамиз", деди Малики.
Агар Қўшма Штатлар ва Исроил бирон бир чора кўрса, Малики Эроннинг жавоби "қаттиқ бўлади", деб таъкидлади.
