ОАВ: Пентагон Эронга қарши уруш учун 200 млрд доллар сўради
Тегишли сўров АҚШ Конгрессига юборилди. Лекин ташаббус Конгресс томонидан қўллаб-қувватланиши сўроқ остида қолган.
Пентагон Эронга қарши урушни давом эттириш учун қўшимча 200 миллиард доллар сўради, деб хабар берди Associated Press АҚШ маъмуриятининг юқори лавозимли амалдорига асосланиб.
Амалдорнинг сўзларига кўра, департамент аллақачон Оқ Уйга тегишли сўров юборган.
APʼнинг тушунтиришича, бу миқдор Пентагон 2025 йилда Президент Доналд Трампнинг катта солиқ имтиёзлари тўғрисидаги қонун лойиҳасининг бир қисми сифатида олган маблағга қўшимча ҳисобланади. Сўров Конгресс томонидан қўллаб-қувватланадими ёки йўқми, ҳозирча номаълум.
Пентагон раҳбари Пит Хегсет 19 март куни бўлиб ўтган матбуот анжуманида сўралган миқдорни тўғридан-тўғри тасдиқлашдан бош тортди ва бу ўзгариши мумкинлигини айтди.
"Биз тегишли маблағни олишимизга ишонч ҳосил қилиш учун яна Конгрессга мурожаат қилмоқдамиз", деди у. "Ёмон одамларни йўқ қилиш учун пул керак."
The Washington Post газетаси илгари Пентагон Эрон билан уруш учун тахминан 200 миллиард доллар маблағ сўраётгани ҳақида хабар берган эди. Пост газетасининг ёзишича, департамент Оқ уйдан Конгрессга юборилган тегишли сўровни қўллаб-қувватлашни сўраган.
Газетанинг таъкидлашича, "бу можарога қарши бўлган қонун чиқарувчиларнинг қаршилигига дуч келадиган улкан янги сўров".
Газета манбаларидан бирининг сўзларига кўра, "баъзи Оқ уй расмийлари Пентагоннинг сўрови Конгресс томонидан маъқулланишининг реал имкониятига эга эмаслигига ишонишади".
