Зеленский Украинанинг қудратли хавфсизлик хизмати раҳбарини ишдан олди

Зеленский Украинанинг қудратли хавфсизлик хизмати раҳбарини алмаштирди.

Васил Малюкнинг лавозимидан олиниши бир қатор юқори мартабали ҳарбий қўмондонлар томонидан кескин танқид қилинди.

Украина Хавфсизлик хизмати (УХХ) асосан ички хавфсизлик ва қарши разведка билан шуғулланади. Россиянинг 2022 йилдаги кенг кўламли босқинидан буён эса у Россия ҳудудининг ичкарисида амалга оширилган суиқасдлар ва диверсия ҳужумларида ҳам муҳим рол ўйнаб келмоқда.

2022 йилдан бери УХХга раҳбарлик қилиб келган Васил Малюк Россияга қарши муваффақиятли операцияларни бошқаргани ҳамда Россия билан алоқадор бўлиши мумкин бўлган икки томонлама агентлардан тозалагани билан обрў қозонган.

Кадрлар алмашинуви уруш бошланганидан бери Президент Зеленский томонидан амалга оширилган узоқ ўзгаришлар занжирининг навбатдагиси бўлди.

Малюкнинг номи бутун Украина бўйлаб танилган. Хусусан, ўтган йил июнь ойида у жасоратли “Ўргимчак тўри” операциясини мувофиқлаштирган. Ушбу ҳужум давомида 100 дан ортиқ украин дронлари Россия ҳудудининг ичкарисидаги ҳарбий авиабазаларга зарба берган. Унинг ўрнига тайинланган Евгений Хмара ҳам мазкур операцияни тайёрлашда иштирок этган.

УХХ раҳбари лавозимидан озод этилганига қарамай, Малюк Россияга қарши махсус операцияларга раҳбарлик қилишда давом этиши сўралган. Зеленский таъкидлашича, Украинага Россия кучларига қарши кўпроқ ассиметрик операциялар зарур ва Малюк бу борада энг яхши мутахассис.

Хмаранинг тайинланиши УХХнинг келажакдаги самарадорлиги борасидаги хавотирларни маълум даражада камайтирди. Бироқ собиқ УХХ ходими Иван Ступакнинг фикрича, Хмаранинг обрўси мустаҳкам бўлса-да, унинг тажрибаси бутун УХХни бошқаришга етадими-йўқми, ҳозирча номаълум.

Ступак, шунингдек, Малюкнинг лавозимдан олиниши собиқ разведка раҳбари Кирилл Будановнинг Зеленскийнинг янги маъмурият раҳбари этиб тайинланиши билан боғлиқ, деб ҳисоблайди.

“Малюк ва Буданов ўртасида кескин келишмовчилик бор”, — деди у ОАВга. Унинг фикрича, Буданов Зеленский қарорига катта таъсир кўрсатган ва энди Хмара "Будановнинг қўли остида" бўлади.

Бошқа таҳлилчилар бу фикрга қўшилмайди. Украинадаги Грунт нашри сиёсий таҳлилчиси Олександр Нотевский Хмаранинг тайинланишини ижобий баҳолаб, унинг УХХнинг энг элит бўлинмаларидан бири — “Алфа”ни бошқарган давридаги муваффақиятларини таъкидлади: “У ёш, тажрибали ва ‘Ўргимчак тўри операцияси муаллифларидан бири.”

УХХ баёнотида Хмара 2022 йилда Киев вилоятини озод қилишда, шунингдек Донецк вилоятининг босиб олинган ҳудудларида Россия кучларига қарши жангларда қатнашган, мукофотларга сазовор бўлган тажрибали махсус операциялар ходими сифатида таърифланди.

Хмаранинг тайинланиши Украина парламенти томонидан тасдиқланиши лозим. Парламент бу қарорни рад этиши ҳам мумкин. Нотевскийга кўра, бошқа номзодлар ҳам кўриб чиқилмоқда.

Қарийб тўрт йиллик урушдан сўнг Украина Россия кучларини анъанавий усуллар билан фронт чизиғида ва жанг майдонида ортга суришда қийналмоқда. Бироқ у нефть объектлари, қурол-яроғ заводлари ҳамда “Ўргимчак тўри” ҳужумидаги каби авиабазалар ва қимматбаҳо ҳарбий техникани нишонга олишда нисбатан катта муваффақиятларга эришди.

Ўтган ҳафта Зеленский ўзининг юқори раҳбариятида жиддий ўзгаришлар эълон қилди. Михаило Федоров янги мудофаа вазири лавозимига номзод сифатида кўрсатилди, ташқи разведка раҳбари Олег Ивашченко эса Буданов ўрнини эгаллади.

Зеленский томонидан амалга оширилган кўплаб кадрлар алмашинуви инқироз даврида мамлакатга зарар етказаётгани учун кўпчилик томонидан танқид қилинмоқда.