Президентнинг АҚШга ташрифида 10га яқин муҳим келишувларга эришилди

Ўзбекистон Президенти Шавкат Мирзиёевнинг АҚШга ташрифи доирасида ўнга яқин битимларга эришилган. Бу ҳақда АҚШ Давлат департаменти маълумот берди. Жумладан:

1.Биргаликда аниқланган нодир металл конларини ўзлаштириш ҳуқуқини биринчи навбатда АҚШ компанияларига таклиф этиш бўйича келишув.

2. Нодир металларни қазиб олиш ва етказиб бериш таъминот занжирини мустаҳкамлаш учун 400 миллион долларгача АҚШ ва Ўзбекистон томонидан биргаликда сармоя киритиш бўйича келишув.

3. Ўзбекистон АҚШ энергетика компанияларидан кичик модулли атом реакторларини сотиб олиши бўйича келишув.

4. Ўзбекистон АҚШдан умумий қиймати 8,5 миллиард долларга тенг жами 22 та Boeing 787 Dreamliner самолётини харид қилиши бўйича шартномалар.

5. Ўзбекистон АҚШдан 2 миллиард АҚШ долларигача бўлган қишлоқ хўжалиги техникаларини импорт қилиши бўйича келишув.

6. Ўзбекистон АҚШдан кейинги уч йил ичида 2 миллион тонна соя ва 100 минг тонна пахта харид қилиши бўйича келишув.

7. Ўзбекистон АҚШдан кейинги уч йил ичида 5 миллиард АҚШ доллари миқдорида автомобиль эҳтиёт қисмларини импорт қилиши ҳамда "UzAuto Motors" компаниясини хусусийлаштириш жараёнига америкалик ҳамкорларни таклиф қилиш бўйича келишув.

8. "Air Products" компанияси томонидан Ўзбекистонда қиймати 3 миллиард АҚШ долларига тенг метанол ишлаб чиқариш заводини қуриш бўйича битим.

9. Ҳар икки давлатнинг ҳуқуқни муҳофаза қилувчи органлари халқаро жиноятчилик тармоқларига қарши курашда маълумот алмашиши бўйича келишув.

АҚШ Президенти Доналд Трампнинг даъво қилишича, кейинги ўн йилда Ўзбекистоннинг АҚШГА киритадиган сармояси миқдори 100 миллиард доллардан ошади.

Эслатиб ўтамиз, учрашувда Шавкат Мирзиёев АҚШ президентини Ўзбекистонга таклиф қилган.

Трампнинг минтақавий можароларни тинч йўл билан ҳал этиш борасида қўшаётган шахсий ҳиссаси алоҳида қайд этилган.