Филиппинда кучли довул сабаб бир миллион киши эвакуация қилинди

Кучли Фунг-вонг довули Филиппинга яқинлашиши оқибатида қарийб 1 миллион киши эвакуация қилинди.

Мамлакат об-ҳаво хизмати бу улкан бўрон энг катта орол Лусон томон яқинлашаётгани ва “ҳаёт учун хавфли шароитлар” ҳақида огоҳлантирмоқда. Лусонда пойтахт Манила ва йирик шаҳар Кесон жойлашган.

Мазкур хавфдан бир неча кун олдинги бошқа тўфон 200 дан ортиқ одамнинг ҳаётига зомин бўлганди. Эндиликда қарийб бир миллион киши ўз уйларини тарк этишга мажбур бўлди.

Фунг-вонг деб номланган бўрон 9 ноябр куни кутилаётган қуруқликка чиқишидан аввал Филиппиннинг шимоли-шарқий ҳудудларига ёпирила бошлади, электр таъминотини узиб қўйди. Об-ҳаво хизмати томонидан мазкур ҳодиса ҳаёт учун хавфли экани ҳақида огоҳлантиришлар эълон қилинди.

Бўроннинг максимал барқарор шамол тезлиги соатига 185 километргача, кучайган шамол тезлиги эса 230 км/соатгача етиши айтилмоқда.

Жануби-шарқий ва марказий ҳудудлар — жумладан Катандуанес, Камаринес Сур ва Аурора — учун энг юқори огоҳлантириш даражаси, 5-сигнални эълон қилди. Метро Манила ва унга яқин вилоятлар эса 3-сигнал остида турибди.

Аввал Калмаэги тўфони марказий орол провинцияларида камида 224 кишининг ўлимига сабаб бўлиб, кейин Ветнамга ёпирилган ва у ерда ҳам камида беш кишининг ҳаётига зомин бўлган.

Филиппин президенти Фердинанд Маркос Калмаэги етказган улкан зарар ва Фунг-вонгдан кутилаётган талафот сабаб фавқулодда ҳолат эълон қилди.

Шимолий-шарқий провинциялардаги хавф даражаси юқори бўлган қишлоқлардан, жумладан Тинч океани бўронлари ва Майон вулқонининг лой оқимларига энг кўп таъсирчан Бикол каби соҳилбўйи ҳудудларидан 916 860 нафардан ортиқ одам эвакуация қилинди.

Филиппин ҳар йили қарийб 20 та тўфон ва бўрон зарбаларига учрайди. Мамлакатни тез-тез зилзилалар ҳам ларзага келтиради ва у ерда ўнлаб фаол вулқонлар мавжуд. Шу сабабли Филиппин дунёдаги энг кўп табиий офатлардан зарар кўрувчи давлатлардан бири ҳисобланади.