Президент амалий ташриф билан Вашингтонга борди

Ўзбекистон Президенти Шавкат Мирзиёев Америка Қўшма Штатлари Президенти Доналд Трампнинг таклифига биноан 4 ноябрь куни амалий ташриф билан Вашингтон шаҳрига келди.

“Эндрюс” авиабазасида давлатимиз раҳбарини АҚШ Давлат котибининг ўринбосари Кристофер Ландау, АҚШ – Ўзбекистон савдо палатаси раиси Керолин Лемм ва бошқа расмийлар кутиб олди.

Ташрифнинг асосий тадбирлари 5-6-ноябр кунлари бўлиб ўтади. Ўзбекистон Президенти Америка Қўшма Штатлари Президенти Доналд Трамп билан учрашади ҳамда Марказий Осиё мамлакатлари ва АҚШ етакчиларининг “С5+1” форматидаги саммитида иштирок этади.

Тадбирлар дастуридан АҚШ Конгресси ва ҳукумати вакиллари билан музокаралар, ушбу мамлакат етакчи компанияларининг раҳбарлари билан алоҳида учрашувлар ҳамда ишбилармон доиралар иштирокидаги давра суҳбати ҳам ўрин олган.

Амалий ташриф билан Вашингтон шаҳрига келган Президент Шавкат Мирзиёевни АҚШда ишлаётган ва таълим олаётган бир гуруҳ ватандошларимиз кутиб олди. Давлатимиз раҳбари улар билан самимий суҳбатлашиб, катта муваффақиятлар тилади.

Шавкат Мирзиёев Вашингтон шаҳрига ташриф доирасида 5 ноябрь куни ўзига ажратилган қароргоҳда АҚШ Конгресси Вакиллар палатаси аъзолари Билль Хайзенга, Керол Миллер ва Сидни Камлагер-Давни қабул қилди.

Ўзбекистон билан АҚШ ўртасидаги стратегик шериклик муносабатларини янада мустаҳкамлаш, икки мамлакат парламентларининг амалий ҳамкорлигини кенгайтириш масалалари кўриб чиқилди.

Қонун чиқарувчи органлар ўртасидаги алоқалар жадал ривожланиб бораётгани, АҚШ Конгрессида Ўзбекистон билан ҳамкорлик бўйича кокус самарали фаолият олиб бораётгани мамнуният билан қайд этилди. Ҳар йили Вакиллар палатасида кокус кўмагида икки томонлама муносабатларни мустаҳкамлашга хизмат қилаётган Ўзбекистон кунлари ўтказиб келинмоқда.

Конгресс олий даражада эришилган, энг аввало, савдо-иқтисодий, инвестициявий ва маданий-гуманитар алоқаларни кенгайтиришга доир келишувларни амалга оширишга ҳар томонлама кўмаклашиши муҳим экани таъкидланди.

Ҳудудлараро алоқаларни кенгайтириш, конгрессменлар вакиллик қилаётган Ғарбий Виржиния, Мичиган ва Калифорния штатлари билан амалий ҳамкорликни йўлга қўйишга алоҳида эътибор қаратилди.

Учрашув якунида АҚШ Конгресси вакилларининг Ўзбекистонга ташрифини уюштириш, шунингдек, икки мамлакат ҳудудлари раҳбарлари бошчилигидаги ишбилармон доиралар делегацияларининг ўзаро ташрифларини ташкил этишга келишиб олинди.

Шавкат Мирзиёев 5 ноябрь куни Вашингтон шаҳрига амалий ташриф доирасида ўзига ажратилган қароргоҳда АҚШ Сенатидаги Марказий Осиё бўйича кокуснинг ҳамраиси, сенатор Стив Дейнсни қабул қилди.

Ўзбекистон билан АҚШ ўртасидаги стратегик шериклик муносабатларини янада мустаҳкамлаш ва кўп қиррали ҳамкорликни кенгайтириш масалалари кўриб чиқилди.

Давлатимиз раҳбари парламентлараро алоқаларга, хусусан, Сенатдаги Марказий Осиё бўйича кокус фаолиятига юқори баҳо берди.

Икки томонлама ҳамкорликда мисли кўрилмаган юксак даражага эришилгани мамнуният билан қайд этилди. Ўзаро савдо кўрсаткичлари ўсмоқда, АҚШнинг етакчи компаниялари билан муваффақиятли кооперация лойиҳаларининг сони кўпаймоқда.

Кейинги ойларда рекорд қийматдаги келишув ва шартномалар имзоланди. Бу галги ташриф давомида янги иқтисодий ҳужжатлар имзоланиши режалаштирилган. АҚШ Конгресси мазкур келишувларнинг амалга оширилишини қўллаб-қувватлаши муҳим экани таъкидланди.

Сенатор Стив Дейнс вакиллик қилаётган Монтана штати билан фаол ҳамкорликни давом эттиришга алоҳида эътибор қаратилди. Штат ишбилармонларининг делегациясини Ўзбекистонга ташрифини ташкил этиш бўйича келишувга эришилди.

Шунингдек, томонларни қизиқтирган долзарб халқаро ва минтақавий масалалар юзасидан фикр алмашилди.