Луврдаги ўғирлик сабаб бир неча киши қўлга олинди

Париждаги Лувр музейида содир бўлган заргарлик буюмлари ўғирлиги бўйича гумонланувчилар қўлга олинди.

Париж прокуратурасининг маълум қилишича, улардан бири мамлакатдан чиқиб кетмоқчи бўлган пайтда ушланган.

Ўтган ҳафта ўғрилар кундузи содир этилган рейд чоғида Лувр музейининг Аполлон галереясини нишонга олиб, бир неча дақиқа ичида ўнлаб миллион еврога тенг заргарлик буюмлари билан қочиб кетишган. Шундан сўнг ўғирликда гумонланувчиларни қўлга олиш учун ўнлаб терговчилар ишга жалб қилинган.

Франция ОАВлари аввал ушбу ҳибслар ҳақида хабар берган бўлиб, полицияга таниш бўлган, ўттиз ёшлар атрофидаги икки эркак қўлга олинган.

BFMTV маълумотига кўра, расмийлар гумонланувчиларни уларнинг ДНК намуналаридан фойдаланган ҳолда аниқлашган. Ҳар иккиси Париж чеккасидаги Обервиле шаҳридан бўлиб, улардан бири айнан шу ерда қўлга олинган. Ўғирликка алоқадор деб гумон қилинаётган камида яна икки киши ҳозирча қидирувда қолмоқда.

Париж прокурори Лор Бекуонинг сўзларига кўра, “қўлга олинган эркаклардан бири Париж яқинидаги Роси аэропортидан (Шарл де Голл аэропорти деб ҳам аталади) мамлакатдан чиқиб кетишга ҳозирланаётган эди.” Маълумотларга кўра, у Жазоирга кечки рейс билан учишидан олдин паспорт текшируви вақтида ушланган.

Прокурор ҳибсга олинганлар сонини ҳам, ўғирланган заргарлик буюмларидан бирортаси топилган-топилмаганини ҳам тасдиқламади.

Ўтган ҳафта охирида ўғрилар Лувр музейининг юқори қаватида жойлашган Аполлон галереясига бостириб киришган. Бу хонада Франция тож заргарлик буюмлари сақланади. Улар музейнинг энг безакли залларидан бири бўлган ушбу галереяга юк машинасига ўрнатилган нарвон ёрдамида деразадан киришган.

Прокурор Лор Бекуо илгари Франция радиосига берган интервьюсида, музейдан ўғирланган заргарлик буюмларининг умумий қиймати 88 миллион евро (тахминан 102 миллион доллар) атрофида эканини айтган. У, шунингдек, ўғирликда айбдорларни аниқлаш ва қўлга олиш учун тахминан 100 нафар терговчи жалб қилинганини маълум қилган.