Абдулла Арипов Қирғизистон пойтахтига борди
Туркий давлатлар ҳукумат раҳбарлари бу ерда иқтисодиёт, савдо, транспорт, рақамлаштириш, энергетика ва қишлоқ хўжалиги бўйича йиғилиш ўтказади.
Ўзбекистон бош вазири Абдулла Арипов Бишкекка борди. Бош вазир у ерда Туркий давлатлар ташкилотига (ТДТ) аъзо давлатлар ҳукумат раҳбарлари ва вице-президентлари йиғилишида иштирок этади.
Ариповни “Манас” халқаро аэропортида Қирғизистон Вазирлар Маҳкамаси раиси ўринбосари, сув, қишлоқ хўжалиги ва қайта ишлаш саноати вазири Бакит Торобоев кутиб олди.
Бугун Бишкекда бўлиб ўтадиган йиғилишда ташкилотга аъзо давлатларнинг ҳукумат раҳбарлари ва юқори мансабдор шахслари ҳамкорликнинг устувор йўналишлари, жумладан, иқтисодиёт, савдо, сармоя, транспорт, рақамлаштириш, энергетика ва қишлоқ хўжалиги каби соҳаларни муҳокама қилади.
Туркий давлатлар ташкилоти туркий мамлакатларни бирлаштирувчи ҳукуматлараро орган бўлиб, унинг Бош котибияти Истанбулда жойлашган.