Элчи: "Ўзбекистон ва Хитой муносабатлари энг яхши босқичда турибди"
2022 йилдан бошлаб ўзаро ҳамкорлик кенг қамровли стратегик шерикликка кўтарилганди. Хитой элчиси Ўзбекистон гилосига талаб жуда катта эканини таъкидлади.
Хитойнинг Ўзбекистондаги Фавқулодда ва мухтор элчиси Юй Цзюн мамлакатлар ўртасидаги дипломатик алоқалар энг яхши босқичда эканини айтди.
Унга кўра, мамлакатлар ўртасидаги кўп асрлик дўстлик муносабатлари янги даражага чиқмоқда.
Ўзбекистон ва Хитой муносабатлари янги даражага кўтарилмоқда. 2022 йилдан бошлаб ҳамкорлик кенг қамровли стратегик шериклик мақомини олди.
Ўзбекистон минтақада биринчи бўлиб Хитой билан бундай юқори даражадаги муносабатларга эришди. Бу ўзаро ишонч ва узоқ муддатли ҳамкорликка тайёрликдан далолат беради.
Сўнгги йилларда Хитойдан Ўзбекистон иқтисодиётига киритилган инвестициялар ҳажми 24,6 миллиард доллардан ошди. Ўзбекистон Президентининг 2024 йил январ ойида Хитойга давлат ташрифи якунлари бўйича умумий қиймати 53,3 миллиард долларлик келишувларга эришилган.
Хитойнинг Ўзбекистондаги Фавқулодда ва мухтор элчиси Юй Цзюн дипломатик алоқаларимизнинг бугунги ҳолати ҳақида шундай дейди:
"Мазкур ташрифни тарихий деб аташ мумкин. Унинг натижасида икки томонлама муносабатларни янги босқичга кўтаришга ҳамда халқаро ҳамкорлигимизни динамик йўналишида янада самаралироқ босқичларга олиб чиқишга имкон яратади.
Бугунги кунда ҳамкорлигимиз деярли барча соҳаларни қамраб олган ва етакчиларимиз ушбу ҳамкорликни янада ривожлантириш учун аниқ режани белгилаб бердилар. Ҳозир Хитой Ўзбекистондан юқори сифатли маҳсулотларни импорт қилмоқда. Масалан, сизларнинг гилосларингиз ҳозир Хитой бозорида катта талабга эга. Шунингдек, қуруқ меваларингиз, масалан, мош ҳар йили катта ҳажмда Хитойга экспорт қилинмоқда. Албатта, саноат маҳсулотларини ҳам олиб келмоқдамиз ".
Элчига кўра, икки давлат етакчилари ҳар йили камида 1-2 марта учрашмоқда ва ривожланишнинг янги йўналишларини белгилаб бермоқда.