Трамп Хитойда йиғилган уч ҳарбий диктатор ҳақида гапирди
АҚШ раҳбари Хитой, Россия ва КХДР етакчиларини "фитна"га тайёрланишда айблаб чиқди.
АҚШ президенти Доналд Трамп Хитойдаги парадда Владимир Путин, Си Цзинпин ва Ким Чен Ин учлигига эътибор қаратди.
Трамп Пекинда ўтаётган Иккинчи жаҳон урушидаги ғалабанинг 80 йиллигини нишонлаш маросимини шарҳлар экан, Хитой раҳбари Си Цзинпин, Россия президенти Владимир Путин ва Шимолий Корея етакчиси Ким Чен Ин “АҚШГА қарши фитна уюштираётганини” айтди.
Трамп фитна деганда нимани назарда тутганини изоҳламаган.
"Хитой Халқ Республикаси раиси ва халқига ажойиб ва унутилмас байрам тилайман. Илтимос, Владимир Путин ва Ким Чен Инга энг самимий тилакларимни етказинг. Улар АҚШга қарши фитна уюштирмоқда", - деб ёзди Трамп Truth Social ижтимоий тармоғида.
Америка раҳбари, шунингдек, "АҚШ Хитойга душман бўлган хорижий босқинчи - милитаристик Япониядан озод бўлиши учун унга кўрсатган улкан ёрдам ва тўкилган қонларни" эслади.
"Кўплаб америкаликлар Хитойнинг ғалабаси ва шон-шарафи учун курашда ҳалок бўлди. Умид қиламанки, улар ҳақли равишда шарафланади ва жасорат ва фидойиликлари учун эсланади", - деб ёзган Трамп.
Эслатиб ўтамиз, 3 сентябр куни Пекинда милитаристик Япония устидан қозонилган ғалабанинг 80 йиллиги ва Иккинчи жаҳон уруши якунига бағишланган ҳарбий парад ўтди.
Унда Хитой қатор қудратли қуролларни кўрсатди. Жумладан, дунёнинг исталган нуқтасини нишонга оладиган ракетани намойиш этилди.