Янги Ўзбекистон кўчасида ерости автомобил йўли очилди
Узунлиги 468 метр бўлган ерости йўли соатига 10 мингдан зиёд автомобилни ўтказиш имкониятига эга.
Президент Шавкат Мирзиёев пойтахтнинг Янги Ўзбекистон кўчасида барпо этилган ерости автомобил йўлини кўздан кечирди.
Йўл инфратузилмасини ривожлантириш ва транспортлар ҳаракатига қулайлик яратиш – мунтазам жараён. Бу, айниқса, аҳоли сони ошиб, ҳудуди кенгайиб бораётган Тошкент учун долзарб масала.
Хусусан, сўнгги йилларда Янги Ўзбекистон кўчасида истироҳат боғи, уй-жойлар, университет ва Олимпия шаҳарчаси қурилди. Бу кўча келгусида Янги Тошкент шаҳрига олиб борувчи асосий йўллардан бири бўлади.
Шу боис, Янги Ўзбекистон кўчаси бўйлаб узунлиги 468, кенглиги 25 метр бўлган ерости автомобил йўли барпо этилди. У соатига 10 мингдан зиёд автомобилни ўтказиш имкониятига эга.
Туннелнинг усти яшил ҳудудга айлантирилиб, “Янги Ўзбекистон” боғи билан Олимпия шаҳарчаси ўртасида пиёдаларнинг хавфсиз ҳаракатланиши таъминланди.
Шунингдек, мазкур йўналишда лойиҳалаштирилган метро йўли учун туннел ва бекат ҳам қурилди.
Айтиш жоизки, юртимизда амалга оширилаётган ҳар бир лойиҳада экологик жиҳатлар алоҳида инобатга олинади. Янги Ўзбекистон кўчасида барпо этилган ерости автомобиль йўли машиналарнинг вақт сарфини 2 баробарга қисқартириб, кунига 1 тонна ёнилғи иқтисод қилинишига ва атмосферага чиқариладиган зарарли газлар миқдори 2 тоннага камайишига сабаб бўлади.
Давлат раҳбари ерости автомобил йўлининг замонавий стандартлар асосида ташкил этилганига эътибор қаратди. Бу каби равон йўллар халқимизга қулайлик яратиб, туризм ривожига ҳисса қўшиши қайд этилди.
Бугун шунингдек, Қатағон қурбонларини ёд этиш маросими бўлиб ўтганди.
Тадбирда Президент Шавкат Мирзиёев иштирок этиб, қатағон қурбонлари, жадидлар ва мустақиллик ҳақида гапириб ўтди.