Ню-Йорк марказида отишма: тўрт киши қурбон бўлди
Ҳодисага нима сабаб бўлгани ҳозирча номаълум. Расмийларга кўра, отишма содир этган шахс руҳий касалликдан азият чеккан.
АҚШнинг Ню-Йорк шаҳри марказида отишма юз берди. Манхэттен марказида номаълум шахсс ўт очди, тўрт кишини ўлдирди.
Ҳалок бўлганлар орасида бир полициячи ҳам бор. Яна бир киши жиддий жароҳат олган. Ҳолат Ню-Йорк шаҳридаги Блекстоун, Миллий футбол лигаси ва турли йирик компаниялар ўз офислари жойлашган Парк Авенюдаги 44 қаватли осмонўпар бинода содир бўлган.
Лас-Вегаслик 27 ёшли Шейн Тамура М4 автомати билан бинога кириб, у ерда дарҳол бир полициячи ва икки кишини ўлдирди, дея хабар беради BBC. Кейин у Ruden Building Management офиси жойлашган қаватга кўтарилиб, яна ўт очди. У ерда бир нафар аёл киши ҳалок бўлган.
Шундан сўнг Тамура қабулхонага қайтиб, ўзини отиб ўлдирди. Сабаби ҳозирча номаълум. Расмийларга кўра, отишма содир этган шахс руҳий касалликдан азият чеккан.
"Ҳодиса сабаблари текширилмоқда ва биз нима учун у айнан шу жойни танлаганини тушуниш устида ишлаяпмиз", деди NYPD комиссари Жессика Тиш.
Эркак уч кун ичида мамлакат бўйлаб саёҳат қилиб, фожиадан бир неча соат олдин Ню-Йоркка етиб келган.