Исроил ва Сурия ўт очишни тўхтатишга келишди
Келишувга АҚШ кўмагида эришилган, Туркия ва Иордания буни олқишлади.
Исроил ва Сурия ўт очишни тўхтатишга келишиб олдилар.
Бу ҳақда АҚШнинг Туркиядаги элчиси Томс Баррак Х тармоғидаги аккаунтида ёзди.
"Исроил Бош вазири Бинямин Нетаняху ва Сурия президенти Аҳмад аш-Шараа Қўшма Штатлар кўмагида Туркия, Иордания ва қўшни давлатлар томонидан олқишлаган ўт очишни тўхтатишга келишиб олдилар.
Биз друзлар, бадавийлар ва суннийларни қуролларини ташлаб, Сурияда тинчлик ва янги бирлик қуришга чақирамиз", дейилади хабарда.
Сурия ва Исроил ўртасидаги кескинлашув шу ҳафтанинг ўрталарида авж олди. Сурияда друзлар ва бадавийлар ўртасидаги қуролли тўқнашувлар билан бошланди, кейинчалик ҳукумат қўшинлари аралашган.
Исроил расмийлари ўз чегараларида зўравонликларга тоқат қилмасликларини иддао қилиб чиқди, шундан сўнг яҳудий армияси Суриядаги ҳарбий объектларга ҳаво ҳужумларини амалга оширди.