Эрдўғон Озарбайжон ва Россия ўртасидаги вазиятга муносабат билдирди

Туркия Озарбайжон ва Россия ўртасидаги таранг вазиятнинг ечим топишига ва бу икки давлат муносабатларига ҳеч қандай путур етказмаслигига умид қилмоқда.

Бу ҳақда Туркия президенти Ражаб Тоййиб Эрдўғон Озарбайжонга ташрифи чоғида гапирди дея хабар берди CNN Turk телеканали.

"Асосий тилагимиз шуки, бу нохуш ҳодисалар икки давлат ўртасидаги муносабатларга тузатиб бўлмас зиён етказмасин. Маҳаллий келишмовчиликларни мавжуд вазиятдан ташқарига олиб чиқмасдан ҳам ҳал қилиш мумкин ва бунинг учун хотиржамликни сақлаш ниҳоятда муҳим", - деди у.

Эрдўғоннинг сўзларига кўра, иккала давлат ҳам “бу инқирозни енгиб ўтиш учун етарли доноликка эга”, Туркия “ҳал қилишга қаратилган конструктив қадамларни” қўллаб-қувватлайди.

"Кавказ энди янги қарама-қаршиликка дош беролмайди", деб ҳисоблайди президент.

Унинг қўшимча қилишича, у Озарбайжон президенти Илҳом Алиев билан вазиятни муҳокама қилган, у "ўта эҳтиёткор ва провокацияларга берилмасдан ва можаро қўзғатмасдан ҳаракат қилади".

Россия-Озарбайжон муносабатларининг кескинлашишига июн ойи охирида озарбайжон диаспораси вакилларининг Екатеринбургда ҳибсга олиниши сабаб бўлган. Бу 2001, 2010 ва 2011 йилларда содир этилган иккита қотиллик ва одам ўлдиришга уриниш бўйича тергов ҳаракатлари билан боғлиқ эди. Натижада ўнга яқин айбланувчи ҳибсга олинди.

Айни вақтда икки гумонланувчи вафот этган. Россия Тергов қўмитаси маълумотларига кўра, улардан бири юрак етишмовчилигидан вафот этган, иккинчисининг ўлими сабаблари аниқланмоқда.

Озарбайжонда суд-тиббиёт экспертлари жасадларда жароҳат излари борлигини маълум қилган, Боку прокуратураси қасддан одам ўлдириш, қийноқлар ва мансаб ваколатларини суиистеъмол қилиш моддалари бўйича жиноий иш очган.

Бунинг ортидан республикада "Спутник Озарбайжон" таҳририяти ходимлари қўлга олинди, уларнинг бир қисми қўйиб юборилди. Аммо ижрочи директор Игор Картавйх ва бош муҳаррир Евгений Белоусов фирибгарлик, ноқонуний тадбиркорлик ва пул ювишда айбланиб ҳибсга олинган.

Россияликларнинг яна бир гуруҳи гиёҳванд моддалар савдоси ва кибержиноятчиликка алоқадорликда гумонланиб ҳибсга олинди.