Ҳиндистонда бортида 242 киши бўлган самолёт ҳалокатга учради
Ҳодиса тафсилотлари ўрганилмоқда, қурбонлар бўйича аниқ рақамлар эълон қилинмаган.
Ҳиндистонда йўловчи самолёти ҳалокатга учради.
ОАВ хабарларига кўра, Air India авиакомпаниясининг Лондонга йўл олган ва бортида юзлаб йўловчи бўлган рейсида Аҳмадобод аэропортидан кўтарилгач фалокат юз берган.
India Today хабарига кўра, бортда 242 киши бўлган. Times of India газетасининг аниқлик киритишича, ҳалокатга учраган самолёт Boeing 787 Dreamliner бўлган.
Air India авиакомпанияси Х ижтимоий тармоғида рейс Аҳмадободдан Лондондаги Гатвик аэропортига учиши кераклиги ҳақида хабар берди.
Хабарда айтилишича, компания ҳозирда ҳодиса тафсилотларини ўрганмоқда.
Оммавий ахборот воситалари ҳалокат жойидан тутун устуни акс этган фотосуратлар ва видеоларни нашр этмоқда.
Ҳалок бўлганлар ва жароҳатланганлар ҳақида ҳозирча аниқ маълумот йўқ.