Тошкент вилоятида бир гуруҳ мансабдорлар фуқаролар номига кредит олиб келгани фош бўлди

Жорий йилнинг 3 март куни жиноят ишлари бўйича Тошкент туман судида бир гуруҳ банк мансабдорлари устидан суд жараёни ўтказилди. Суд иши Platina.uz ихтиёрида мавжуд.

Маълум бўлишича, Ш.Р. “Х” банк Келес филиали Чакана хизматлар бўлими бош мутахассис лавозимида ишлаб келган. У етакчи мутахассис лавозимида ишлаган С.Х. ва бошқалар билан ўзганинг пул маблағлари эвазига шахсий бойлик орттириш мақсадида бир гурух бўлган холда ўзаро жиноий тил бириктирган.У турли фуқаролар номига карта ва анкеталар очган ҳолда кредит маблағларини фуқароларнинг номига очилган пластик карталарга ўтказиб юбориб, 159,0 млн. сўмлик кредит пул маблағларини нақдлаштириб, ўзлаштириш йўли билан талон-торож қилган.У кредит маблағларини талон-торож қилганлигини яшириш мақсадида кредит йиғма ҳужжатларини қасддан нобуд қилиб, филиалнинг молиявий-хўжалик фаолияти бўйича ўтказилган ҳужжатли тафтишга тақдим этмаган.

Судланувчи С.Х. Келес филиалда етакчи мутахассис лавозимида ишлаб келиб, ташкилотнинг мансабдор шахси бўла туриб, 2020 йил давомида кредит маблағларини фуқароларнинг номига очилган пластик карталарга ўтказиб юбориб, 83 млн. сўмлик кредит пул маблағларини нақдлаштириб, ўзлаштириш йўли билан талон-торож қилган.

Судланувчи Ё.А "Х" банк Келес филиали Чакана хизматлар бўлими бошлиғи лавозимида ишлаб келган.У фуқаролар номига кредит ва маиший техникалар олиш бўйича лимит ажратиб 76,0 млн. сўмлик кредит пул маблағларини нақдлаштириб, ўзлаштириш йўли билан талон-торож қилган.

Яна бир банк амалдори С.Н эса кредит маблағларини фуқароларнинг номига очилган пластик карталарга ўтказиб олиб, 98,0 млн. сўмлик кредит пул маблағларини нақдлаштириб, ўзлаштириш йўли билан талон-торож қилган.

Барча айбланувчилар судда ўз айбига қисман иқрор бўлди.

Якуний суд ҳукмига кўра, судланувчиларга жазо тайинлаш масаласини муҳокама қилиниб, уларнинг жиноий ҳаракатлари оғир жиноятдан унча оғир бўлмаган жиноятга қайта малакаланганлиги, жиноят содир қилинган кундан ҳукм чиқариш вақтига қадар 4 йил муддат ўтганлигини инобатга олинди. Натижада улар жазодан озод этилди.