Иссиқхона газлари салкам 16 млн тоннага камаяди – Шавкат Мирзиёев

Яқин 5 йилда қайта тикланувчи энергия манбалари улуши 54 фоизга етказилади, бу иссиқхона газлари чиқишини қарийб 16 миллион тоннага қисқартириш ва Ўзбекистон Париж келишуви доирасида иссиқхона газлари чиқиндисини 35 фоизга камайтириш бўйича ўз зиммасига олган мажбуриятларни муддатидан олдин бажаришга имкон беради.

Шавкат Мирзиёев нуфузли "Euronews" телеканалига берган интервюсида минтақа ва дунёдаги ҳолат, иқлим, экология, қайта тикланувчи энергия манбалари ва бошқалар ҳақида гапирди.

– Айни пайтда Ўзбекистон ва минтақадаги бошқа давлатлар қайта тикланувчи энергетика салоҳиятини фаол кенгайтирмоқда. “Яшил” энергетика ва иқлим соҳасидаги лойиҳаларни амалга ошириш Марказий Осиёда “углерод кредитлари” бозорини ривожлантиришга хизмат қилади. Бу механизм корхоналарга экологик тоза технологияларга инвестициялар жалб қилиш имконини беради, шунингдек, углерод квоталари савдоси соҳасида халқаро ҳамкорлик платформасига айланади, – деди президент.

Унинг таъкидлашича, фаолият юритаётган 14 та янги қуёш ва шамол электр станцияларига қўшимча равишда умумий қуввати 24 минг мегаватт бўлган 50 дан ортиқ шундай лойиҳа амалга оширилади.

Шунингдек, энергетика тизимлари модернизация қилиниб, самарадорлиги оширилади ва углерод изини камайтиришга хизмат қилади.

Интервюни тўлиқ бу ерда ўқиш мумкин.