Харидорни камситувчи шартлар қўйган корхона жаримага тортилди

Рақобат қўмитасининг Навоий вилояти ҳудудий бошқармаси томонидан устун мавқеига эга “QIZILTEPA TUMAN YO`LLARDAN FOYDALANISH” ДМ фаолияти ўрганилди.

Корхона томонидан 2024 йил давомида асфалтбетон иссиқ, совуқ қоришмаси, қора шебен маҳсулотларини сотиш бўйича тузилган шартномаларни амалдаги меъёрий ҳужжатларга риоя этилиши юзасидан ўрганиш ўтказилди.

Олиб борилган ўрганиш натижаларига кўра, “QIZILTEPA TUMAN YO`LLARDAN FOYDALANISH” ДМ томонидан ўтган йил давомида тузилган 4 та шартномаларнинг барчасида харидор учун камситувчи шартлар киритилганлиги боис корхона ўз устун мавқеидан фойдаланиш аломатлари мавжудлиги аниқланган.

Мисол тариқасида, шартномаларнинг қўйидаги бандларида:

-етказиб берилган маҳсулотлар ҳақини кечиктирилганлиги учун “Харидор” кечиктирилган ҳар бир кун учун кечиктирилган тўлов суммасининг 0,4 % миқдорида, лекин шартнома суммасининг 50 % дан ошмаган миқдорда пеня тўлаши қайд этилганлиги;

-маҳсулотларни етказиб бериш муддатлари кечиктирилганлиги учун “Маҳсулот етказиб берувчи” кечиктирилган ҳар бири кун учун мажбурият бажарилмаган қисмининг 0,4 % миқдорида, лекин ушбу суммасининг 10 % дан ошмаган миқдорда, пеня тўлаш шарти киритилганлиги;

Юқоридаги аниқланган ҳолатларга мувофиқ, ҳудудий бошқарма Махсус комиссияси томонидан “Рақобат тўғрисида”ги Қонун ва Вазирлар Маҳкамасининг 256-сонли қарори билан тасдиқланган Низом талаблари бузилиши аломатлари билан "QIZILTEPA TUMAN YO`LLARDAN FOYDALANISH” давлат муассасасига нисбатан иш қўзғатилиб, натижаси юзасидан молиявий жарима қўллаш ҳақида қарор қабул қилинди.

Шунингдек, қонунбузилиш ҳолатини бартараф этиш ва келгусида йўл қўймаслик бўйича бажарилиши мажбурий бўлган кўрсатма берилди.