Трамп ва Путин деярли 2,5 соат суҳбатлашди: маълумотлар

18 март куни Россия президенти Владимир Путин ва АҚШ президенти Доналд Трамп ўзаро телефон суҳбати ўтказди.

Тафсилотларга кўра, Владимир Путин Доналд Трампга 19 март куни Россия ва Украина томонлари ўртасида 175 га 175 маҳбус алмашиши ҳақида маълум қилди. Шунингдек, 23 нафар оғир яраланган украиналик ҳарбий хизматчилар ҳам топширилади.

30 кунлик оташкесим ғояси контекстида Россия бутун жанговар алоқа чизиғи бўйлаб мумкин бўлган ўт очишни тўхтатиш режимини кузатиш билан боғлиқ масалаларни белгилаб берди.

Путин Россия томони таслим бўлган тақдирда Украина Қуролли Кучлари аскарларининг ҳаёти ва Россия қонунлари ва халқаро ҳуқуқ нормаларига мувофиқ муносиб муносабатда бўлишини кафолатлашини тасдиқлади, дейилади Кремл хабарида.

Россия президенти Доналд Трампнинг Россия ва Украинанинг энергетика инфратузилмасига зарба беришдан 30 кун давомида ўзаро воз кечиши ҳақидаги ғоясини қўллаб-қувватлади ва ҳарбийларга шундай буйруқ берганини айтди.

Путин Доналд Трампнинг Қора денгизда навигация хавфсизлиги бўйича ташаббусни амалга ошириш ғоясига ижобий жавоб берган.

Лекин асосий масала, 30 кунлик сулҳ бўйича тезкор келишув ҳақида гап-сўз бўлмаган.

Украина ппрезиденти Владимир Зеленский эса Путиннинг сўзларига қарамасдан Украина инфраструктурасига ҳужумлар бўлаётгани ҳақида гапирди.

Кремл хабар беришича, Трамп билан суҳбатда Путин “можаро авж олишининг олдини олиш ва уни сиёсий-дипломатик йўллар билан ҳал қилишга ҳаракат қилишнинг асосий шарти хориждан ҳарбий ёрдамни тўлиқ тўхтатиш ва Киевга разведка маълумотларини тақдим этиш бўлиши кераклигини” таъкидлаган.

Аммо Трамп Fox News телеканалига берган интервьюсида Путин суҳбатда бундай талаблар қўймаганини айтди.

"Биз ёрдам ҳақида умуман гаплашмадик. Кўп нарсаларни гаплашдик, аммо ёрдам ҳеч қачон муҳокама қилинмади", - деди АҚШ раҳбари.