Трамп ва Путин суҳбати: АҚШ Россия билан дизел ёқилғиси бўйича келишувга эришди
Россия томони АҚШ ва жаҳон бозорида 3 млн тоннагача дизел ёқилғиси етказини кутилмоқда. Украина президенти Владимир Зеленский эса мазкур келишувни "тинчлик келтирмайдиган ва урушга инвестиция киритадиган шартнома" деб атади.
АҚШ президенти Доналд Трамп россиялик ҳамкасби Владимир Путин билан "жуда муваффақиятли музокаралар" давомида Россия дизел ёқилғисини жаҳон бозорларига етказиб бериш бўйича келишувга эришганликларини эълон қилди.
"Россия дарҳол АҚШ ва жаҳон бозорларига 300 000 тоннадан ортиқ дизел ёқилғисини, ноябрь ойида қўшимча 500 000 тонна ва ундан кейин дарҳол 1 000 000 тонна дизел ёқилғисини етказиб беради. Билaн бирга, нефтни қайта ишлаш заводларининг ҳолатига қараб, Россия қисқа муддатда 3 000 000 тонна дизел ёқилғисини етказиб беради", деб ёзган Америка етакчиси Truth Social тармоғида.
Трампнинг сўзларига кўра, АҚШнинг Ҳўрмуз бўғозини назорат қилиши ва Россия билан келишув туфайли Қўшма Штатларда ва бутун дунёда дизель ёқилғиси нархи тез пасая бошлайди.
Америка президенти нархларнинг пасайиши "рекорд суръатларда" содир бўлишини айтди.
Шундан сўнг, АҚШ Молия вазирлиги Россия дизел ёқилғисини жаҳон бозорига етказиб бериш учун вақтинчалик рухсатнома берди. Лицензия 2027 йил 7 апрелгача амал қилади. Ҳужжатга кўра, рухсатнома Россия дизел ёқилғисини сотиш, етказиб бериш, тушириш ва импорт қилишни, шу жумладан тўғридан-тўғри АҚШни ҳам қамраб олади.
Бироқ, лицензия Россия банки, Миллий фаровонлик жамғармаси ва Россия Молия вазирлигининг Америка молия институтларидаги ҳисобларидан маблағларни ечиб олишга рухсат бермайди. Лицензия OFAC директори Брэдли Смит томонидан 2026 йил 9 октябрда имзоланган.
Россия Президентининг хорижий давлатлар билан инвестиция ва иқтисодий ҳамкорлик бўйича махсус вакили Кирилл Дмитриев АҚШ Молия вазирлигининг X ижтимоий тармоқ платформасидаги постига изоҳ берар экан, "Россия ва АҚШ ўртасидаги дизел ёқилғиси ва энергетика соҳаларидаги ҳамкорлик бутун дунёга фойда келтиради" деб таъкидлади.
Трампнинг постига жавобан Дмитриев президентларнинг телефон қўнғироғини муваффақиятли деб атади. "Россия ва АҚШ ўртасидаги энергетика ва иқтисодий ҳамкорлик давом этади ва глобал бозорлар ва бутун дунёга фойда келтиради", деб ёзган у.
Украина президенти Владимир Зеленский эса мазкур келишувни "тинчлик келтирмайдиган ва урушга инвестиция киритадиган шартнома" деб атади.
