Бир қатор туманларнинг мастер-режалари “яшил” тамойиллар асосида ишлаб чиқилмоқда

Қорақалпоғистоннинг Чимбой ва Амударё, Қашқадарёнинг Миришкор, Бухоронинг Ғиждувон ва Ромитан туманларининг комплекс иқтисодий ривожланиш мастер-режаларини тажриба-синов тариқасида “яшил” тамойиллар асосида ишлаб чиқиш белгиланган эди.

Макроиқтисодий ва ҳудудий тадқиқотлар институти Германия халқаро ҳамкорлик жамияти (GIZ) билан ҳамкорликда “яшил” тамойиллар асосида мастер-режаларни ишлаб чиқмоқда. Мастер-режалар доирасида амалга ошириладиган лойиҳаларни аниқлашда инструмент сифатида давлат-хусусий сектор мулоқотларидан (PPD – Public Private Dialogue) фойдаланилмоқда.

Иқтисодий ривожланишдаги муаммоларни ҳал қилиш ва имкониятларни аниқлашда давлат ва хусусий сектор вакиллари ўртасидаги мулоқотлар муҳим аҳамият касб этиб, бундай тадбирлар қарашлар, устуворликлар, мақсадлар ва ғояларни алмашиш учун ҳукумат ва хусусий сектор ўртасидаги расмий ёки норасмий очиқ мулоқот механизми ҳисобланади. Мазкур ёндашув маҳаллий манфаатдор томонларни қарорлар қабул қилиш жараёнларига жалб қилиш ва ҳудудий ривожланиш ташаббусларида ўз сўзларини айтишга имкон беради.

Ҳозиргача Миришкор, Чимбой ва Амударё туманларида аҳоли, тадбиркорлар ва маҳаллий ҳокимлик вакиллари билан давлат-хусусий сектор мулоқоти учрашувлари ўтказилди. Маҳаллий манфаатдор томонлар таклифлари негизида лойиҳалар рўйхати шакллантирилиб, драйвер йўналишлар ва “яшил” тамойиллар асосида амалга ошириладиган пилот лойиҳалар аниқлаб олинди.

Миришкор туманининг мастер-режасини ишлаб чиқиш якуний босқичда бўлиб, халқаро экспертлар билан бирга туманнинг мавжуд салоҳиятидан келиб чиқиб, маҳаллий ишлаб чиқаришни кенгайтириш, янги хизматларни йўлга қўйиш, инфратузилмани яхшилаш ва меҳнат ресурсларини ривожлантириш йўналишлари драйверлар сифатида белгилаб олинди.