Очилмаган сирлар: сувости цивилизациялари

Инсон сувсиз яшай олмайди. Одам танасининг ярмидан зиёдини сув ташкил этади. Сайёрамиз сиртининг 71 фози сув билан қопланган. Тарихдаги илк маданиятлар ва шаҳарлар ҳам айнан дарёлар ва уммонлар бўйида пайдо бўлган.

Тирик биомассанинг 22 фоизи қуруқликда, 78 фоизи уммонларда ҳаёт кечиради. Уларнинг кўпчилиги ҳали фанга номаълум, умуман ўрганилмаган. Ҳозир ҳам деярли ҳар ойда янги бир тур кашф этилади.

Сув дунёси, шунингдек, ўзининг сирли ҳодисалари билан ҳам инсонни ўзига мафтун этади. Бизгача етиб келган кўплаб эртаклар ва афсоналар, урф-одат ва маросимларда сув дунёси билан боғлиқ жиҳатлар сезиларли даражада катта.

Умуман, қадим замонлардан бери одамзот сувда, айниқса, уммонлар остида яшовчи ақлли жонзотлар борлигига ишониб келган. Сув париси, тритон, наяда, сиреналар ва бошқа сув жонзотлари ҳақидаги афсоналар турли халқлар фолклорида учрайди. Қадимги юнон мифологиясида нереидлар ва тритонлар – ярим одам, ярим балиқ танаси бўлган мавжудотлар тилга олинади. Славян мифологиясида мермаидлар – сув руҳлари бўлиб, баъзан одамлар учун хавф солган. Япон маданиятида "нинги" – инсоний хусусиятларга эга денгиз жонзотлари ҳақида афсоналар мавжуд.

Қолаверса, яқин ўтмишдаги денгизчилар шунга ўхшаш мавжудотларни кўрганликларини даъво қилишган. Христофор Колумб Кариб денгизи соҳилларида сув парилари билан учрашгани ҳақида, капитан Жон Смит эса Шимолий Aмерикадаги сирли сув жонзотлари ҳақида ёзган. Бироқ бу кузатувлар ҳақиқийми ёки йўқми, ҳамон сирлигича қолмоқда.

Сувдаги гуманоидларга илмий қараш

Замонавий илм-фан сув парилари ёки сув остидаги бошқа ақлли гуманоидларнинг мавжудлигини тасдиқламайди. Бироқ океанни тадқиқ қилиш ҳали ҳам тўлиқ эмас – унинг чуқурлигининг 80% дан ортиғи ҳамон ўрганилмаган. Бу турли гумон ва тахминларни урчитиши табиий.

Энг аввало, бу ҳодисаларни эволюцион назариялар билан тушунтиришга уринишади. Баъзи олимлар "сув маймунлари" гипотезасини илгари суришади. Яъни айрим қадимги приматлар сувда ҳаётга қисман мослашган бўлиши мумкин. Бироқ бундай эволюция ҳақида ҳеч қандай далил йўқ.

Бу тахминларга асос бўладиган аномалия топилмалари ҳам фанга маълум. Aрхеологик тадқиқотлар жараёнида баъзан балиқ ва одамларнинг хусусиятларига эга жонзотларнинг тасвирлари топилган. Лекин 2012 йилда AҚШнинг Океан ва атмосфера миллий бошқармаси сув париларининг мавжудлигига ҳеч қандай илмий далил йўқлигини расман эълон қилди. Аммо баъзи тадқиқотчилар гибрид мавжудотлар тасвирланган қадимий қўлёзма ва чизмаларни топишгани ҳам фактлигича қолмоқда.

Шу пайтгача океанларда улкан каламушлар, шаффоф балиқлар ва ҳаддан ташқари катта босим остида яшай оладиган организмлар каби ноодатий ҳаёт шакллари топилган, албатта. Шунинг учун биз туша олмайдиган ва ҳали ўрганмаган катта чуқурликларда ўрганилмаган турлар кўп бўлиши, улар орасида одамсимон ва ақлли мавжудотлар ҳамда улар яратган цивилизациялар яширинган бўлиши мумкин.

Гарчи сув ости цивилизациясининг мавжудлиги ҳақида илмий далиллар мавжуд бўлмаса-да, турли халқлардаги афсоналар ва гувоҳларнинг кўрсатмалари одамларни бундай тамаддунни қидириш сари илҳомлантиришда давом этмоқда.

Улар бир саволга – сув остида ақлли ҳаёт борми, деган саволга жавоб қидиришади. Замонавий океан тадқиқотлари, шунингдек, олимлар ва тадқиқотчилар томонидан қайд этилган тушунарсиз, аномал ҳодисалар сув остида бизнинг кўзимиздан яширинган юқори даражада ривожланган цивилизациялар мавжуд бўлиши мумкинлигини кўрсатмоқда.

Сувости маданияти мавжудлигини тасдиқлаши мумкин бўлган фактлар ҳам талайгина, улардан айримлари ростан эътиборга молик ҳамда одамни ўйлантириб қўяди.

1. Чуқур денгиздаги аномал сигналлари

Олимлар океанларда келиб чиқиши номаълум бўлган кучли акустик сигналларни бир неча бор қайд этишган. Мисол учун, Bloop сигнали (1997) шунчалик кучли бўлганки, унинг манбаи кўк китдан каттароқ жонзот бўлиши керак эди. 2014 йилда эса Julia сигнали ҳам қайд этилган бўлиб, унинг келиб чиқиши, яъни қандай аппарат ёки жонзот бу сигнал манбаи экани сирлигича қолмоқда.

2. Тушунтириб бўлмайдиган сувости иншоотлари

Япониянинг Йонагуни минтақасида шаҳар харобаларига ўхшаган улкан тош тузилмалар топилди. Тузилмаларга сунъий равишда қайта ишлов берилганга ўхшайди. Бу қадимги сувости цивилизацияси мавжудлигидан дарак бериши мумкин. Шунга ўхшаш иншоотлар Куба қирғоқларидан ҳам топилган. У ерда сувга чўкиб кетган шаҳар қолдиқлари топилган.

3. Тушунтириб бўлмайдиган сувости туннеллари

Дунёнинг турли бурчакларида сувости туннеллари ва ғорлар тизимлари топилган бўлиб, уларнинг келиб чиқиши сирлигича қолмоқда. Эҳтимол, улар ақлли мавжудотлар томонидан яратилган бўлиши ҳам мумкин. Яқинда тадқиқотчилар Aнтарктида остида қадимги цивилизацияларнинг изларини ўз ичига олган деб тахмин қилинувчи туннелларни топишди.

4. Сувости аномал зоналари

Бермуд учбурчаги кўплаб кемалар ва самолётлар ғойиб бўлган жойдир. Баъзи тадқиқотчилар минтақада транспортга таъсир кўрсатадиган технологиядан фойдалана олувчи яширин цивилизация бор, дея тахмин қилишмоқда. Худди шундай аномалиялар Япония қирғоқлари яқинидаги Иблис денгизида ҳам қайд этилган.

5. AҚШ Ҳарбий-денгиз кучларининг сув остидаги НУЖ билан учрашиши ҳақидаги ҳужжатлари

AҚШ ҳарбийлари сув остида замонавий технологиялар билан эришиб бўлмайдиган тезликда ҳаракатланаётган объектларни бир неча бор қайд этган. Ҳисоботларда номаълум сув ости объектларига (USO – Unidentified Submerged Objects) дуч келингани ҳақида сўз боради. 2019 йилда AҚШ ҳарбий-денгиз кучлари ғалати нарсалар акс эттирилган баъзи видеоларнинг ҳақиқийлигини расман тан олди.

6. Океан тубидаги сирли объектлар

Болтиқ денгизида гигант номаълум учар жисм – НУЖга ўхшаш объект топилди. Тадқиқотлар шуни кўрсатадики, у табиий шаклланишларга ўхшамайдиган ғайриоддий шакл ва тузилишга эга. Объект яқинида кемаларнинг навигация асбобларидаги носозликлар қайд этилган. Бироқ объектни қўлга киритишнинг имкони бўлмаган.

7. Қадимги афсона ва ривоятлар

Кўпгина маданиятларда сувости цивилизациялари Aтлантида, Лемурия, Нагачамп (ҳинд мифологияси) ҳақида афсоналар мавжуд. Эҳтимол, бу ҳикоялар реал фактларга асосланган бўлиши мумкин. Шимолий Aмерика ҳиндуларининг афсоналарида океанларда яшаган сирли “сув одамлари” ҳам эсга олинади.

8. Сув остидаги улкан соялар

Aнтарктида ва Тинч океани сувларида баъзан ўлчамлари маълум бўлмаган, денгиз ҳайвонларидан ошиб кетадиган мавжудотларнинг силуэтларига ўхшаш улкан ҳаракатланувчи соялар кузатилади. Чуқур денгиз транспорт воситалари томонидан олинган видеоёзувлар аномал жисмлар мавжудлигини тасдиқлайди.

9. Сувдаги гуманоид мавжудотлар билан алоқалар

СССРда учувчилар ва ғаввослар Байкал кўли тубида ғалати одамсимон мавжудотлар билан учрашганликлари ҳақида бир неча бор хабар беришган. Бу жонзотлар кумуш костюмлар кийган ва аквалангларсиз ҳаракатланган. Шундай ҳодисалардан бири бир неча ғаввоснинг ўлимига сабаб бўлган эди.

10. Баъзи сув ости ҳудудларидаги юқори даражали радиация

Океан тубининг баъзи ҳудудларида радиация даражаси ғайритабиий даражада юқори, буни табиий омиллар билан изоҳлаб бўлмайди. Жумладан, Бразилия қирғоқлари ва Тинч океанининг шимолий қисмида юқори радиация даражаси қайд этилган. Эҳтимол, бу сув остидаги технологик объектларнинг излари бўлса ҳам эҳтимол.

11. Сув тубидаги ёруғ ёлқинлар

Денгизчилар ва сувости кемалари экипажи океан тубида ғалати ёруғлик порлаши ҳодисаларини бир неча бор қайд этишган. Баъзи талқинларга кўра, улар келиб чиқиши номаълум электр станциялари бўлиши мумкин. Айтиш жоиз, худди шундай ҳодисалар Ҳинд океанида ҳам қайд эилган.

12. Ғойиб бўлувчи сувости кемалари

Изсиз ғойиб бўлган кемалар ва сувости кемалари ҳақида кўплаб ҳикоялар мавжуд ва уларнинг қолдиқлари ҳеч қачон топилмаган. Баъзи ғойиб бўлиш ҳодисалари ғайритабиий электромагнит “чақнашлари” кузатилган ҳудудларда юз берган.

13. Сув остидаги электромагнит тўлқинлари “чақнаши”

Aтлантика ва Тинч океанларида кучли электромагнит импулслар қайд этилмоқда, бу юқори даражада ривожланган мавжудотлар фаолияти натижаси бўлиши мумкин. Бу жойларда ғалати ёруғлик чақнашлари ҳам кузатилади.

14. Сирли топилмалар

Олимлар денгиз тубида ёши цивилизациялар ривожланишининг маълум тарихий даврларига тўғри келмайдиган артефактларни топиб туришади. Масалан, 2013 йилда Кариб денгизида одамсимон мавжудотлар тасвирига ўхшаш ҳайкалчалар топилган.

15. Сувости эволюцияси назариялари

Баъзи тадқиқотчиларнинг таъкидлашича, ақлли мавжудотлар фақат Ерда эмас, сув остида ҳам параллел равишда эволюция босқичларини босиб ўтган. Улар кириш қийин бўлган чуқурликларда яширин сувости маданиятини ташкил этишган бўлиши тахмин қилинади.

16. Сувнинг ҳеч қандай сабабсиз ғалати чайқалишлари

Денгизчилар бир неча бор сувнинг ҳеч бир сабабсиз (манбаси кўзга кўринмас ҳолатда) кўтарилиб тушаётгани, чайқалаётганини, улкан сув устунлари тарзида кўтарилганини кузатишган. Бу номаълум сувости механизмлари ишининг натижаси, деб тахмин қилинади.

17. Сувости эҳромлари

Aтлантика океани тубида эҳром(пирамида)га ўхшаш ғалати бинолар топилган. Уларнинг жойлашуви чўкиб кетган Aтлантида қитъаси (ёки давлатининг) тахминий координаталарига тўғри келади.

18. Аквалангчиларнинг кузатувлари

Баъзи профессионал ғаввослар сув остида ғалати нарсаларни – порлаётган шарларни, тез ҳаракатланувчи сояларни кўрганликларини айтишди. Аммо уларни илмий жиҳатдан изоҳлаб беришнинг иложи бўлмаган.

19. Aномал сувости оқимлари

Океаннинг баъзи жойларида тушунтириб бўлмайдиган кучли сув оқимлари қайд этилади. Бу номаълум технологиялар фаолиятининг натижаси бўлиши мумкин.

20. Марсни тадқиқ қилиш ва сувости иншоотлари

Баъзи астрономлар Марсда топилган қадимий тузилмалар ва океан тубидаги сирли шаклланишлар ўртасидаги ўхшашликларга ишора қилишган. Бу эса қадимги цивилизациялар ўртасида боғлиқлик бўлиши мумкинлиги ҳақидаги назарияларни пайдо қилган.

Хулоса

Албатта, ушбу келтирилган фактлар сувости цивилизациясининг мавжудлиги ҳақидаги саволга аниқ жавоб бермайди, бирор-бир тахминни исботлаши ҳам душвор. Лекин улар сизни ўйлашга мажбур қилади. Сайёрамиздаги океанлар биз тасаввур қилганимиздан-да кўпроқ сирларга эга бўлиши мумкин. Тадқиқотлар давом этмоқда ва эҳтимол келажакда биз сув остида ақлли ҳаёт ҳақиқатан мавжудлигини тасдиқловчи далилларни топа оламиз.

Абулфайз Сайидасқаров