Украина Курск вилоятини икки ҳафта ичида тарк этиши мумкин
Бу ҳақда украиналик расмийларга асосланиб АҚШ нашри хабар берган.
Украина кучлари икки ҳафта ичида Россиянинг Курск вилоятини тарк этиши мумкин.
7 март куни Россия қўшинлари Курск вилоятининг Суджа шаҳри яқинида Украина Қуролли кучларининг мудофаа чизиғини ёриб ўтди, шу сабабли Украинанинг Курск вилоятига етти ойлик мудофааси “қулаш арафасида”, деб ёзади The New York Post.
Унга кўра, Украина қуролли кучлари икки ҳафта ичида Россия ҳудудини тарк этиши мумкин.
Нашр Украина расмийларига асосланиб хабар берган. Уларнинг фикрича, ҳарбий хизматчиларнинг Курск вилоятидан олиб чиқилиши “минтақага кириш ва чиқишни чеклаш” билан оқланиши мумкин.
Курскда жойлашган баъзи украиналик аскарлар Россия ҳудуди устидан назоратни сақлаб қолиш учун олиб борилган курашни "сиёсий" деб ҳисоблайдилар ва операция "ўз вақтидан кўра кўпроқ қурбонларга олиб келишини" қайд этишади.
Курск вилоятида Украина қуролли кучлари билан жанглар 2024 йил 6 августдан бери давом этмоқда. 2025 йил январь ойида Россия Мудофаа вазирлиги Россия армияси қарийб 801 квадрат километр ҳудудни қайта назоратга олгани ҳақида хабар берди.
Бу дастлаб босиб олинган ҳудудларнинг 63 фоизини ташкил этади.
Феврал ойида президент Владимир Путин россиялик ҳарбий хизматчилар Курск вилоятидаги давлат чегарасини кесиб ўтиб, Украина ҳудудига кирганини маълум қилган эди.
