Сурияда хавфсизлик кучлари 50 нафардан ошиқ алавитларни отиб ўлдирди
Алавитлар собиқ президент Башар Асад мансуб бўлган қатлам саналади.
Суриянинг янги ҳукуматига содиқ хавфсизлик кучлари ғарбий Латакия вилоятида алавит озчиликка мансуб 52 кишини отиб ўлдиргани айтилмоқда.
Бу ҳақда Британияда жойлашган Сурия Инсон ҳуқуқлари обсерваторияси (SOHR) хабар бермоқда.
SOHR Латакиядаги уйлардан бирининг боғида ўнлаб фуқаролик кийимидаги жасадлар тўпланиб қолгани акс этган видеотасвирга таяниб маълумот бермоқда.
Мамлакат ички ишлар вазирлигидаги манба Суриянинг расмий SANA ахборот агентлигига берган интервьюсида “индивидуал қоидабузарликлар” бўлганини тан олди ва уларни тўхтатишга ваъда берди.
ОАВ бу одамлар Суриянинг янги ҳукмдорлари қўл остидаги кучлар томонидан ўлдирилгани ҳақидаги даъволарни тасдиқлай олмаган.
Аввалроқ Латакияда хавфсизлик кучлари ва ҳокимиятдан ағдарилган президент Башар Асад тарафдорлари ўртасида тўқнашувлар бўлгани маълум бўлган эди.
SOHR маълумотларига кўра, уларда 70 дан ортиқ киши ҳалок бўлган.
