Европа етакчилари мудофаа харажатларини сезиларли миқдорда оширишга келишиб олдилар
Махсус йиғилишда Украина президенти Владимир Зеленский ҳам иштирок этди.
ЕИ етакчилари Европа хавфсизлигини таъминлаш учун мудофаа харажатларини сезиларли даражада оширишга келишиб олдилар.
Германиянинг Deustch Welle телерадиоканали маълумотларига кўра, Европа иттифоқининг 27 давлатидан 26 таси (Венгриядан ташқари) етакчилари “Украина мустақиллиги, суверенитети ва ҳудудий яхлитлиги”ни ҳурмат қилувчи тинчлик келишувига чақирувчи ҳужжатни имзолаган, шу билан бирга музокараларга Украинани ҳам қўшган.
Алоҳида ҳужжатда Европанинг барча 27 етакчиси мудофаа харажатларини ошириш учун миллиардлаб евро ажратиш бўйича таклифларни қўллаб-қувватлаб, Европа Комиссиясини “барча аъзо давлатларда миллий даражада муҳим мудофаа харажатларини камайтириш”нинг янги усулларини излашга чақирди.
Етакчилар Европа Комиссияси президенти Урсула фон дер Ляйеннинг мамлакатларга умумий қиймати 150 миллиард еврогача бўлган кредитлар бериш тўғрисидаги таклифини эътиборга олишди ва режа уларнинг ой охиридаги навбатдаги йиғилишигача кўриб чиқилишини айтишди.
Махсус йиғилишда Украина президенти Владимир Зеленский ҳам иштирок этди ва Европа Иттифоқи етакчиларига сўнгги кунларда АҚШ билан муносабатлари ёмонлашгани учун кўрсатган ёрдами учун миннатдорчилик билдирди.
Тадбирдан сўнг Франция президенти Эммануэл Макрон журналистларга Европа Иттифоқи Россияга қарши санкциялардан Украинага 33 миллиард доллардан ортиқ ёрдам берилишини айтди.
