platina.uz

Трамп ва Зеленский тортишиб қолди

Якунда украин президенти Оқ уйни эрта тарк этди. Уни ҳатто одатдаги кечги овқатга ҳам таклиф этишмади.

Жаҳон
1 март, 9:12
Трамп ва Зеленский тортишиб қолди

АҚШ президенти Доналд Трамп Украина президенти Владимир Зеленский билан Оқ уйда учрашди. ОАВ хабар қилишича, Овал кабинетдаги матбуот анжумани асабий вазиятда якунланган.

Украина раҳбари Киев ўт очишни тўхтатишга тайёр эмаслиги ва Вашингтондан хавфсизлик кафолатига муҳтож эканини айтганидан кейин вазият таранглашган.

Бунга жавобан Трамп Зеленскийга АҚШга етарлича “ҳурмат кўрсатмаётганини” ва “Америка ўзини қандай тутиши бўйича кўрсатма беришга ҳаққи йўқлигини” айтган.

Унинг қўшимча қилишича, Киев тинчлик ўрнатиш чоғида “муросага” бориши керак, агар Украина ҳукумати келишувдан бош тортса, Қўшма Штатлар унда иштирок этмайди.

“Сиз бизга мен буни хоҳлайман, шуни хоҳлайман, деб айта олмайсиз. Бизсиз қўлингизда карталар йўқ, биздан миннатдор бўлишингиз керак. Биз сизга 350 миллиард доллар бердик, сиз ҳозир қийин аҳволдасиз. Мен урушни тўхтатмоқчи эмасман, дея олмайсиз. Ё биз бу битимни тузамиз ёки сиз ундан чиқиб кетасиз. Сиз миннатдорлик кўрсатмаяпсиз”, деди Трамп.

“Мен бу ерга карта ўйнаш учун келганим йўқ”, деб жавоб берди Зеленский ва Макрон ҳамда Меркел иштирокида Путин билан шартнома имзолаганини қўшимча қилди.

Шунингдек, Трамп минераллар бўйича келишув бугун имзоланишини айтди. Оқ уй раҳбарига “Агар ўт очишни тўхтатиш рўй бермаса, Украинага қўшимча қурол жўнатасизми?”, деб берилган саволга у ижобий жавоб берди.

“Ҳа, биз кўпроқ қурол юборамиз. Аммо урушни тезда тугатиб, бошқа ишлар билан шуғулланишимизга умид қиламиз”, деди Трамп.

Якунда Зеленский Оқ уйни эрта тарк этди. Уни ҳатто одатдаги кечги овқатга ҳам таклиф этишмади.

© 2025 Platina.uz. Барча ҳуқуқлар ҳимояланган. «Platina.uz» сайтида жойланган маълумотлар муаллифнинг шахсий фикри. Сайтда жойланган ҳар қандай материаллардан ёзма рухсатсиз фойдаланиш тақиқланади.
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги томонидан 02.12.2022 санасида №051412 сонли гувоҳнома билан ОАВ сифатида рўйхатга олинган.
Platina.uz сайтида реклама жойлаштириш масаласида +998 97 022 01 10 телефон рақамига (Telegram: Platina PR) мурожаат қилинг. Таҳририят билан алоқа: info@platina.uz
18+