АҚШда яшаш имконини берадиган "олтин карта"лар жорий этилиши мумкин

АҚШ президенти Доналд Трамп “олтин карталар” деб аталмиш ҳужжат 5 миллион долларга сотилишини айтди.

Бу карта эса хорижликларга АҚШда яшаш ва ишлаш ҳуқуқини беради.

"Биз бу картага тахминан 5 миллион долларлик нарх белгилаймиз ва у сизга яшил картанинг афзалликларини беради. У орқали сиз фуқароликни ҳам олишингиз мумкин. Ва бадавлат одамлар бизнинг мамлакатимизга келиб, бу картани сотиб олишади", деди Трамп Овал кабинетда журналистларга.

Йиғилишда иштирок этган АҚШ Савдо вазири Говард Латник “олтин карта” ҳукуматнинг EB-5 иммиграцион инвестор визаси дастури ўрнини эгаллашини таъкидлади.

“Албатта, улар (харидорлар) текширувдан ўтишлари керак”, — дея қўшимча қилди Латник.

АҚШ президенти, ўз навбатида, карталар сотуви тахминан икки ҳафта ичида бошланишини таклиф қилди.

Россиялик олигархларга карталарни сотиш ҳақида ўйлаб кўрасизми, деган саволга Трамп шундай жавоб берди: "Ҳа, бу мумкин. Мен бир нечта россиялик олигархларни биламан - жуда яхши одамлар".