Навоийда инфратузилма ва аҳоли турмушини яхшилаш учун 25,5 млрд сўм ажратилади

Халқ депутатлари Навоий вилояти кенгаши қарори билан маҳаллий бюджетдан 25,5 млрд сўм ажратилиши белгиланди.

Маблағлар ифратузилма харажатлари, аҳоли турмуш даражасини яхшилаш, ҳудудларни ижтимоий-иқтисодий ривожлантиришга йўналтирилади.

Қарор иловасида харажатлар жадвали келтирилган. Жумладан, 2,5 млрд сўм маблағ вилоят ҳарбий-маъмурий секторини ривожлантириш жамғармасига тақдим этилади, вилоят ҳокимлиги маъмурий биноси харажатлари учун 2,4 млрд сўм, халқаро туризм ярмаркалари ва кўргазмалари учун 1 млрд сўм берилади.

Ҳудудий футбол ассосиацияларини қўллаб-қувватлашга 183 млн сўм, кўпқаватли уйлардаги электр тармоқлари(шит)ни таъмирлаш учун 944 млн сўм, Хатирчи туманидаги 49-мактабга 45 млн сўм, Навбаҳор туманидаги касб-ҳунар мактабини реконструкция қилиш харажатлари учун 1 млрд сўм ажратилади.

Навоий шаҳридаги 10-мактабни мукаммал таъмирлашга 699 млн сўм, Нуротадаги туғруқхонани таъмирлашга 95 млн сўм, вилоят телевидениесини реконструкция қилиш учун 500 млн сўм ажратилиши кўзда тутилган.

Навоий шаҳрида кутубхона қуришга 1 млрд сўм берилади. Хатирчида хотира хиёбони қуришга 500 млн сўм кетиши белгиланган.

Вилоят ҳокимлигига кечиктириб бўлмайдиган ва фавқулодда харажатлар учун 7 млрд сўм пул йўналтирилади.