Хоразмда бюджетдан 27 млрд сўмдан ошиқ пул ажратилди

Халқ депутатлари Хоразм вилояти кенгаши қарори билан маҳаллий бюджет ҳисобидан бюджет ташкилотлари ва бюджетдан пул олувчиларга 27 млрд сўмдан ошиқ пул ажратилди.

Иқтисодий жиноятларга қарши курашиш департаменти бошқармаси маблағларнинг сарфланишини назорат қилади.

Қарор иловасига кўра, Миллий гвардия Хоразм вилояти бошқармаси Чавандозлар мактаби ҳудудига қўшимча бино ва иншоотлар қуриш учун 4,5 млрд сўм тақдим этилади.

Шовот ва Тупроққалъа туманларида Ёшлар марказини қуриш ва жиҳозлаш ишлари учун 5 млрд сўм "Ягона буюртмачи хизмати" инжиниринг компанияси ДУКка ажратилади.

Вилоятда қурилаётган "Янги Ўзбекистон" массивлари ҳудудларини ободонлаштириш, чироқлар ўрнатиш ва бошқа харажатлар учун 5,1 млрд сўм берилади.

Халқаро тадбирларни юқори савияда ўтказиш учун LED монитор харид қилиш учун 1,5 млрд сўм, вилоят кураш федерацияси ходимлари иш ҳақи учун 1 млрд 380 млн берилади.

Шунингдек, Паҳлавон Маҳмуд ҳақида филм ("Хива лангари") суратга олиш харажатлари учун 1 млрд сўм берилиши кўзда тутилган.