Россия ва АҚШ делегацияси Саудияда музокара ўтказади
Жараён 18 феврал куни бўлиб ўтиши кутиляпти. Унда АҚШ давлат котиби ва Россия ТИВ раҳбари қатнашиши айтилмоқда.
18 феврал куни Саудия Арабистонида Россия ва АҚШ делегацияларининг учрашуви бўлиб ўтади, дея хабар бермоқда Америка ва Россия ОАВлари.
Бу ҳақда Axios портали (иккита манбага таянган ҳолда) ва "Коммерсант" газетаси хабар берди.
Учрашувда Америка томонидан Давлат котиби Марко Рубио, миллий хавфсизлик бўйича маслаҳатчи Майкл Уолц ва Яқин Шарқ бўйича махсус элчи Стив Виткофф иштирок этиши кутилмоқда.
Виткофф аввалроқ Fox News телеканалига Уолц билан якшанба куни кечқурун Саудия Арабистонига боришини айтган эди. Рубио у ерга душанба куни Исроилдан келади.
Россия делегациясига ким раҳбарлик қилиши расман эълон қилинмаган, бироқ ОАВ манбалари бу Россия ташқи ишлар вазири Сергей Лавров бўлиши мумкинлигини ёзмоқда.
Музокараларда Россия президенти ёрдамчиси Юрий Ушаков ва Ташқи разведка хизмати директори Сергей Наришкин ҳам иштирок этиши мумкин.
