Трамп Путин билан музокаралар бошлашга келишганини эълон қилди

АҚШ президенти Доналд Трамп Россия етакчиси Владимир Путин билан телефонда гаплашганини айтди. Кремль матбуот котиби суҳбатни тасдиқлади.

"Мен ҳозиргина Россия президенти Владимир Путин билан узоқ ва жуда самарали телефон орқали суҳбатлашдим. Биз Украина, Яқин Шарқ, энергетика, сунъий интеллект, долларнинг мустаҳкамлиги ва бошқа мавзуларни муҳокама қилдик", — деб ёзди АҚШ президенти Truth Social ижтимоий тармоғида.

Трампнинг айтишича, у ва Путин икки давлат жамоалари "зудлик билан музокараларни бошлаши" ҳақида келишиб олган.

"Мен Давлат котиби Марко Рубио, Марказий разведка бошқармаси директори Жон Ратклифф, миллий хавфсизлик бўйича маслаҳатчи Майкл Вальс ва махсус элчи Стив Виткоффдан музокараларга бошчилик қилишни сўрадим, улар муваффақиятли ўтишига ишончим комил", - дея қўшимча қилди АҚШ президенти.

Шунингдек, Трамп постида Путиннинг Вашингтонга, Трампнинг эса Москвага ташриф буюриши мумкинлиги муҳокама қилинаётгани айтилган.

Бундан ташқари, АҚШ президенти Владимир Зеленскийни Путин билан бўлган суҳбат ҳақида хабардор қилишини таъкидлади.

Ўз навбатида, Россия президентининг матбуот котиби Дмитрий Песков Путин ва Трамп учрашувга тайёргарликни бошлашга келишиб олганини маълум қилди.

Песков, шунингдек, Путин Трампни Москвага таклиф қилганини тасдиқлади.