Жияни номига катта кредит олиб, чув туширган тадбиркор жазоланди
У қимматбаҳо машина сотиб олиш баҳонасида икки банкдан ажратилган кредитларни ўз эҳтиёжлари учун ишлатиб юборган.
Жиноят ишлари бўйича Учтепа туман судида жияни номига икки маротаба йирик миқдорда кредит олиб, пулларни ўзлаштирган тадбиркорга ҳукм ўқилди. Суд ҳукми Platina.uz ихтиёрида мавжуд.
Унга кўра, Р. Б. МЧЖ раҳбари бўла туриб, жияни Н.Х.ни ишонтириб унинг номига BYD Han машинасини сотиб олишини айтган. Бунинг учун 2023 йил 5 декабр куни "М" банкдан 517 млн миқдорида кредит расмийлаштирилган.
Бироқ, Р.Б. автотранспорт воситасини сотиб олмасдан, ҳужжатларни сохталаштириб, ушбу кредит маблағларини ўз эҳтиёжига сарфлаб юборган. Банкка эса 2023 йил ноябрида бошқа МЧЖдан шартнома асосида олинган BYD Han автомашинаси ҳужжатларини тақдим этган.
Бундан ташқари Р. Б. жиноий хатти-ҳаракатларини давом эттириб, такроран алдаш ва ишончни суиистеъмол қилиш йўли билан ўзганинг мулкини қўлга киритиш мақсад қилган. У такроран жиянини ишонтириб, "Т" банкдан 472 млн миқдорида кредит маблағларини олиб, уни ҳам ўз эҳтиёжлари учун ишлатиб юборган.
Суд мажлисида судланувчи айбига қисман иқрорлик билдириб, ҳозирда содир қилган ҳаракатлари оқибатларини тушуниб етиб, чин кўнгилдан пушаймонлигини билдирди, оилавий шароитини инобатга олиб, енгилроқ жазо тайинлашни сўраб, кўрсатув бериб ўтди.
Якуний ҳукмга кўра, судланувчига 2 йил 4 ой 12 кун ахлоқ тузатиш ишлари жазоси тайинланди. Ҳар иккала банкка етказилган моддий зарар тўлиқ қопланган.
Суд иши Олий суд порталидан олинди.
