Paynet Humo тўлов тизимини сотиб олди
Келишув 65 миллион доллар миқдорида баҳоланмоқда.
Paynet компанияси Humo тўлов тизимини сотиб олди. Бу ҳақда Давактив хабар берди.
"Миллий банклараро процессинг маркази" АЖ устав капиталидаги 100 фоиз давлат акциялар пакетини сотиш бўйича бошланган очиқ савдо жараёнларида 6 нафар талабгор иштирок этиш учун таклиф қилинган.
Белгиланган муддатларда Консултантга Жамиятни сотиб олиш бўйича 3 нафар талабгорлардан Мажбуриятга эга бўлган таклифлар келиб тушди ҳамда 65 млн АҚШ доллари миқдоридаги энг юқори харид баҳосини таклиф қилган “Пайнет” АЖ савдо ғолиби деб топилди.
"Таъкидлаш жоизки, мазкур таклиф Консултант томонидан ҳисобланган Жамиятни сотиш мумкин бўлган индикатив нархлар оралиғида жойлашган ҳамда халқаро мустақил баҳоловчи “КПМГ” томонидан баҳоланган қийматидан юқори.
Талабгор келгусида Жамиятга тегишли “Ҳумо” тўлов тизимини барқарор ва узлуксиз ишлашини таъминлашга қаратилган қўшимча тадбирларни амалга ошириш бўйича мажбуриятларни, шунингдек, тизим фойдаланувчиларининг конфиденциал (шахсий ва банк) маълумотларини ҳимоя қилишни зиммасига олган", дейилади хабарда.
Жамиятни хусусийлаштириш натижалари Давлат активларини хусусийлаштириш ва хусусийлаштириш жараёнларини мувофиқлаштириш давлат комиссиясининг тегишли қарори билан маъқулланган.
Маълумот учун: Paynet АЖ – Ўзбекистон молиявий технологиялар соҳасида 18 йилдан буён фаолият юритаётган энг йирик тўлов операторларидан биридир.
Мазкур тўлов тизими орқали 1 500 дан зиёд маҳсулот етказиб берувчи ва хизмат кўрсатувчиларга тўлаш имконияти яратилган ҳамда йилига 20 млн.дан зиёд фойдаланувчилар ушбу хизматлардан фойдаланиб келмоқда.
