Хитойда метапневмовирус шиддат билан тарқала бошлади
Касаллик одатда енгил кечса-да, чақалоқлар, кексалар ва иммунитети заиф одамларда жиддий асоратларни келтириб чиқариши мумкин.
Хитойда метапневмовирус авж олиши кузатилмоқда.
23 декабрдан 29 декабргача шифохоналардан олинган кўплаб касаллик намуналари грипп вируси, одам метапневмовируси ва риновирус учун ижобий натижа берди. Бу ҳақда Хитой Касалликларни назорат қилиш ва олдини олиш бошқармаси хабар берди.
Тадқиқот шуни кўрсатдики, бугунги кунда ўткир респираторли юқумли касалликлар мамлакатда фаол тарқалмоқда.
Хусусан, 14 ёш ва ундан кичик ёшдаги болалар орасида метапневмовирус билан касалланиш кўпаймоқда, бу кўпроқ шимолий вилоятларда қайд этилган.
Independent нашри аввалроқ Хитойда респиратор вирус билан касалланиш ҳолатлари кўпайиб бораётгани, бу шифохоналарнинг тўлиб кетишига олиб келгани ҳақида ёзган эди. Бу қишда Хитойнинг шимолий провинцияларида инсон метапневмовируси (HMPV) деб аниқланган вирус билан касалланиш ҳолатлари кескин кўпайди, айниқса болалар ўртасида тарқалди.
Метапневмовирус шамоллаш ва гриппга ўхшаш симптомларни келтириб чиқаради.
Касаллик одатда енгил кечса-да, айниқса, чақалоқлар, кексалар ва иммунитети заиф одамларда пневмония каби жиддий асоратларни келтириб чиқариши мумкин, деб ёзади газета.
Декабр ойи охирида Тайваннинг Money UDN нашри метапневмовирус туфайли ўлим даражаси 43% га етганини ёзди. Тезкор скрининг учун реагентларга эга бўлган COVID-19 дан фарқли ўлароқ, инсон метапневмонияси вирусини текшириш учун жуда кўп реагентлар мавжуд, дея таъкидлади портал. Бундан ташқари, ҳозирги вақтда ушбу вирусни даволаш учун антивирал препаратлар мавжуд эмас, фақат касаллик учун қўллаб-қувватловчи терапия буюрилиши мумкин.
