Германия ва Франция ТИВ раҳбарлари Сурияга борди

Германия ва Франция ташқи ишлар вазирлари Суриянинг амалдаги раҳбари билан учрашди.

Анналена Бербок ва Жан-Ноэл Баррот Ғарбнинг йирик давлатларидан Сурияга биринчи ташриф буюрган ташқи ишлар вазирлари бўлди.

Ташриф Европа Иттифоқи номидан амалга оширилди.

Германия Ташқи ишлар вазирлигининг Бербокнинг Берлиндан кетишидан олдин эълон қилинган баёнотида, Европа Иттифоқи Сурияни сиёсий қайта қуриш ва ҳокимиятни тинч йўл билан топширишда қўллаб-қувватлашга тайёрлиги айтилган.

"Германия ва унинг халқаро ҳамкорлари Суриянинг ички сиёсий жараёни бузилмаслигини таъминлаш тарафдори. Шу мақсадда биз БМТ билан биргаликда Ақабада (Иорданиядаги шаҳар) муҳим тамойилларни ишлаб чиқдик. Буларга барча қўшни давлатларнинг суверенитети ва ҳудудий яхлитлигини ҳурмат қилиш киради. Шунингдек, Россия Суриядаги ҳарбий базаларини тарк этиш вақти келди”, — деди Германия ташқи ишлар вазири Анналена Барбок.

Франция ТИВ раҳбари Париж Суриянинг янги маъмуриятига Конституцияни ишлаб чиқишда техник ва ҳуқуқий ёрдам кўрсатишга тайёрлигини таъкидлади. У мамлакатдаги барча этник ва сиёсий гуруҳларни қамраб олувчи инклюзив мулоқотни йўлга қўйиш муҳимлигини таъкидлади.

Баррот ва Бербок, шунингдек, Асад режими пайтида машҳур қийноқлар маркази бўлган Седная қамоқхонасига ташриф буюришди.

Эслатиб ўтамиз, Сурия ҳукумати раҳбари Аҳмад ал-Шаара"Ҳаят Таҳрир аш-Шом" гуруҳининг етакчиси бўлиб, Башар ал-Ассад режимининг қулашига олиб келган тезкор ҳужумга раҳбарлик қилган.