Банкнинг катта миқдордаги пулини ўзлаштирган шахс 8,5 йилга қамалди

Жиноят ишлари бўйича Юнусобод туман судида банкнинг йирик миқдордаги маблағини ўзлаштириб юборган шахсга нисбатан суд иши кўриб чиқилди. Суд ҳукми Platina.uz ихтиёрида мавжуд.

Маълум бўлишича, судланувчи А.А таниши Ж.Б билан "TUMOSAN TECH” МЧЖни 100.000.000 сўмга сотиб олишга келишган. Унга жамият ўзининг номига ўтганидан сўнг Хитой билан ҳамкорлик қилиб, автобуслар олиб келишини айтиб, банкдан кредит олиш учун бошқа бир таниши З.Н.нинг турмуш ўртоғи номида бўлган уйни гаровга қўйдиришга муваффақ бўлган.

Шунингдек, А.А бошқа бир танишига тегишли ошхонани ҳам гаровга қўйдирган.

Натижада улар банкдан 2 млрд 750 млн сўм кредит олган. Б.Ж ўзининг пластик картасига 1.000.000.000 сўм, таниши Ф.Музаффаров картасига 1.000.000.000 сўм ва А.Акбаров тақдим қилган Ё.Ўроқовнинг пластик картасига 1.000.000.000 сўм, қолган 288.000.000 сўм пулларни “CTROYMET LYUKS” МЧЖ ҳисоб рақамига ўтказиб берган.

А.А ўзига ишониб топширилган ўзганинг жуда кўп миқдордаги пул маблағларини мақсадли сарфламасдан, ушбу пул маблағларини банк орқали нақдлаштириб, кредит маблағларини ҳам тўламасдан, шахсий манфаатлари йўлида сарфлаб юборган.

Бундан ташқари, А.А. жиноий фаолиятини давом эттириб, шериги У. Н билан “Нексия 3” русумли автомашинани пулини бўлиб тўлаш шарти билан олишган.

Сўнгра машинани бошқа бир шахсга 9700 АҚШ долларига сотиб юборишган. Лекин тушган пулларни машинанинг ҳақиқий эгасига тақдим этишмаган.

Жараёнда судланувчи А.А ўз айбларини тан олмади.

Якуний ҳукмга кўра, у ЖКнинг 167-моддаси 3-қисми “а” банди ва 168-моддаси 3-қисми “б” бандида назарда тутилган жиноятларни содир этганликда айбли деб топилди. А.А.га узил-кесил ўташ учун 8 йил 6 ой муддатга озодликдан маҳрум қилиш жазоси тайинланди. Жазони қаттиқ тартибли колонияларда ўташ белгиланган.

Банкка етказилган зарарни қоплаш суд қарори билан гаровга қўйилган икки мулкка нисбатан йўналтирилган.

Суд иши Олий суд порталидан олинди.