Хитой ва АҚШнинг ядро қуроли бўйича музокаралари тўхтаб қолди

Давлат департаменти вакилига кўра, икки мамлакат 2023 йилнинг ноябридан бери ядровий қурол назорати бўйича мулоқот қилмаяпти. Хитой ҳам мазкур баёнотга жавоб қайтарди. 

Жаҳон
2 май, 14:03
Хитой ва АҚШнинг ядро қуроли бўйича музокаралари тўхтаб қолди

АҚШ Давлат департаменти вакилининг айтишича, Қўшма Штатлар ва Хитой 2023 йилнинг ноябридан бери ядровий қурол назорати бўйича мулоқотга киришмаяпти. Пекин бу баёнотга жавобан "мегафон дипломатияси"дан фойдаланишни тўхтатишга чақирди.

"Афсуски, ХХР кейинги учрашувни рад этди ва биз тақдим этган вариантларга мазмунли жавоб бермади", деган Давлат департаменти вакили Semafor нашрига.

Вакилга кўра, Вашингтон Пекинга ядро ва космик соҳаларда можаро ёки кескинлашув хавфига қарши курашиш учун "оқилона қадамлар"ни таклиф қилган. Режа мамлакатлар ўртасидаги алоқаларни яхшилаш, шунингдек, баллистик ракеталарни синовдан ўтказиш учун огоҳлантириш тизимини яратиш ва коинотдаги кескинликни камайтиришга қаратилган ҳаракатларни ўз ичига олган.

Хитойнинг Вашингтондаги элчихонаси вакили Лю Пенгю Давлат департаменти вакилининг сўзларига жавобан, йирик ядровий арсеналларга эга бўлган давлатларни кейинги музокаралар учун ядровий қуролларни сезиларли даражада камайтиришга чақирди.

АҚШ ва Хитой 2023 йилнинг ноябрь ойида Вашингтонда қурол-яроғ назорати бўйича маслаҳатлашувлар ўтказганди. 2024 йилнинг апрель ойида Қўшма Штатлар биринчи марта Осиё-Тинч океани минтақасида ўрта масофага учувчи қуруқликдаги ракета тизимларини жойлаштирди. Машқлар доирасида ФилиппингаTyphon тизимлари жойлаштирилди. Илгари бундай қуроллар Россия-Америка ўрта ва узоқ масофага мўлжалланган ядровий кучлар тўғрисидаги шартномага мувофиқ тақиқланган эди.

Эслатиб ўтамиз, ядровий каллакдан сони бўйича АҚШ дунёда иккинчи (5244 та) , Хитой эса учинчи давлат (410 та) саналади. 

© 2023 Platina.uz. Барча ҳуқуқлар ҳимояланган. «Platina.uz» сайтида жойланган маълумотлар муаллифнинг шахсий фикри. Сайтда жойланган ҳар қандай материаллардан ёзма рухсатсиз фойдаланиш тақиқланади.
Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлиги томонидан 02.12.2022 санасида №051412 сонли гувоҳнома билан ОАВ сифатида рўйхатга олинган.
Platina.uz сайтида реклама жойлаштириш масаласида +998 97 022 01 10 телефон рақамига (Telegram: Platina PR) мурожаат қилинг. Таҳририят билан алоқа: info@platina.uz
18+