Ўзбекистон ёшлари Кувайтни янчиб ташлади

Ёшлар ўртасида ўтаётган Осиё биринчилиги гуруҳ босқичининг 2-тури доирасида Ўзбекистон терма жамоаси Кувайт термаси устидан ишончли ғалабага эришиб, кейинги босқич масаласини ҳал қилиб қўйди.

5:0 ҳисобида йирик ғалабага эришган ўзбекистонликлардан Давронов 32-дақиқада ҳисобни очган бўлса, 49-дақиқада Ҳамроалиев, 55-дақиқада Эркинов, 86-дақиқада Холматов, 90+6-дақиқада Норчаев ҳисобни йирик кўринишга келтирди.

71-дақиқада кувайтликлар футболчиси Ҳамад ат-Тавил футболчимиз Абдурауф Бўриевга қўполлик ишлатгани учун қизил карточка олиб, майдонни тарк этди. Шунингдек, 90+3-дақиқада ҳамюртларимиз бир пеналтини ура олмади.

Шу тариқа Ўзбекистон ёшлар термаси гуруҳда пешқадамга айланиб олди. Нариги ўйинда Вьетнам Малайзияни 2:0 ҳисобида енгди. 3-тур доирасида гуруҳ пешқадамлари 23 апрел куни куч синашадилар.

Ёшлар ўртасида Осиё чемпионати, гуруҳ босқичи, 2-тур

Кувайт - Ўзбекистон 0:5
Голлар: Давронов 32, Ҳамроалиев 49, Эркинов 55, Холматов 86 пен., Норчаев 90+6

Малайзия - Вьетнам 0:2
Голлар: Ван Канг 39, Мин Коа 60