Қозоғистон шифохоналарида ниқоб тақиш мажбурий қилинмоқда
Шунингдек, аҳоли гавжум жойларда ҳам ниқоб тақиш тавсия этилади.
Қозоғистонда тиббиёт муассасаларида яна ниқоб тақиш тартиби жорий этилди ва аҳоли гавжум жойларда ниқоб тақиш тавсия қилинмоқда.
Бу ҳақда Бош давлат санитария шифокори Айжан Эсмагамбетова эълон қилган қарорда айтилади.
“Тиббий ташкилотларда ходимлар ва ташриф буюрувчиларнинг тиббий ниқоблардан фойдаланишини, антисептик воситалар мавжудлигини таъминлаши зарурлигига қарор қиламан”, дейилади “Ҳаво-томчи орқали юқадиган юқумли касалликлар тарқалишининг олдини олиш бўйича профилактика чора-тадбирларини кучайтириш тўғрисида”ги ҳужжатда.
Шунингдек, аҳолига аэропортлар, темир йўл ва автовокзаллар, бозорлар, савдо ва кўнгилочар марказлар, театрлар, кинотеатрлар, давлат хизматлари марказлари, банклар ва барча транспорт турларида ниқоб тақиш тавсия этилади.
Қарор 8 февралдан кучга кирган.
