Ўзбекистон бозорларида пиёз нархи ошяпти
Мамлакат пиёз экспорти бўйича жаҳонда юқори ўринларни эгаллайди.
East Fruit таҳлилчиларига кўра, Ўзбекистонда сўнгги икки ҳафта ичида пиёзнинг улгуржи нархларида бироз ўсиш тенденцияси кузатилган. Хусусан, 2024 йил январ ойи ўрталаридан бошлаб пиёз нархи аллақачон 28 фоизга ёки килограмм учун 4 АҚШ центи (қарийб 500 сўм)га ошган.
Бироқ Ўзбекистонда пиёз нархи ўтган йилгидан роппа-роса тўрт баравар арзон, шунингдек, ўрим-йиғим давридагидан ҳам пастроқ. Шунинг учун пиёзнинг ҳозирги нархи улгуржи сотувчига катта фойда келтирмайди.
Бозор иштирокчиларининг фикрича, сўнгги ҳафталарда пиёз нархининг ошишига Европа Иттифоқига маҳсулот экспорти ҳажмининг ошиши сабаб бўлмоқда. Хусусан, Полшада улгуржи бозорларда Ўзбекистондан кўплаб пиёз сотилмоқда, бу эса ушбу мамлакатда ички нархларни ушлаб туришга ёрдам беради.
Шуниси қизиқки, Полша бозори ва Ўзбекистон бозори ўртасидаги улгуржи пиёз нархидаги фарқ ҳозирда маҳсулотни экспорт қилиш харажатларини қоплаш учун етарли даражада эмас. Бироқ, бозор иштирокчиларининг фикрига кўра, маҳсулотларни ташиш учун давлат субсидиялари бу муаммони ҳал қилишга ёрдам беради.
Бундан ташқари, Полшадан келган савдо манбаларининг хабар беришича, беларуслик воситачилар пиёз савдосида фаол иштирок этиб, Ўзбекистон ва Тожикистондан пиёз сотиб олиб, уларни Полшага жуда жозибадор нархда сотмоқда.
Эслатиб ўтамиз, Ўзбекистон ҳар йили 200 дан 250 минг тоннагача пиёз экспорт қилиб, жаҳонда кучли ўнталикка киради. 2023/24 йилги мавсумда Ўзбекистондан пиёз экспорти рекорд даражада бўлиши кутилмоқда ва East Fruit ҳисоб-китобларига кўра, биринчи марта 300 минг тоннадан ошиши мумкин.
Эслатиб ўтамиз, ўтган йили ҳам январ ойидаги кучли совуқ сабаб пиёз нархлари кескин ошганди.
