Ўзбекистон кўп гўшт истеъмол қиладиган давлатлар рўйхатидан жой олди

Ўзбекистон мол гўшти кўп истеъмол қилинадиган мамлакатлар рейтингида олтинчи ўринни эгаллади.

Бир Ўзбекистон фуқароси ўртача ҳисобда 86,5 граммга яқин гўшт истеъмол қилади,

БМТ озиқ-овқат ва қишлоқ хўжалиги ташкилоти маълумотларига кўра, Ўзбекистоннинг ҳар бир фуқароси йилига ўртача 31,6 килограмм мол гўшти истеъмол қилади. Демак, ҳар бир Ўзбекистон фуқаросига кунига қарийб 86,5 грамм мол гўшти тўғри келади. 

Бу кўрсаткичлар бўйича Ўзбекистон жаҳон рейтингида олтинчи ўринни эгаллади. Аргентина, Зимбабве, АҚШ, Австралия ва Бразилия каби давлатлар мамлакатдан олдинда жойлашган. Қўшни Қозоғистон етакчи ўнталикни якунлади.

Статистика агентлигининг дастлабки маълумотларига кўра, 2023 йилда Ўзбекистонда 2,8 млн тонна гўшт (тирик вазнда) етиштирилган.

Гўшт етиштириш ҳажми 2022 йил билан солиштирилганда 3,9 % га ошган. Вилоятлар ичида Самарқанд биринчи ўринни эгаллаган - 326 минг тонна.