Суриядаги қуролли тўқнашувда 14 полициячи ҳалок бўлди
Улар собиқ президент Башар Асад тарафдорлари томонидан ўлдирилган, дейди мамлакат муваққат ҳукумати ички ишлар вазири.
Суриядаги қуролли тўқнашувда 14 полициячи ҳалок бўлди.
Мамлакатнинг янги ички ишлар вазирининг айтишича, аввалроқ тўқнашувлар бўлиб ўтган Тартус вилоятида ҳокимиятдан ағдарилган президент Башар Асад тарафдорлари томонидан 14 полициячи ўлдирилган.
"Вазирликнинг 14 нафар ходими хавфсизликни таъминлаш бўйича ўз вазифаларини бажараётганда жиноий тузум қолдиқлари томонидан қўйилган пистирмада ҳалок бўлди, яна 10 нафари яраланди”, деди ўтиш даври ҳукуматидаги Ички ишлар вазирлиги раҳбари Муҳаммад Абдул Раҳмон.
Қароргоҳи Буюк Британияда жойлашган Сурия Инсон ҳуқуқлари обсерваторияси (SOHR) Хирбет ал-Маоза шаҳридаги тўқнашувлар натижасида 14 нафар хавфсизлик кучлари ҳамда 3 нафар қуролли киши ҳалок бўлганини маълум қилди. У ерда Ички ишлар вазирлиги ходимлари Дамашқ яқинидаги машҳур Седная қамоқхонасидаги жиноятларга алоқадор бўлган зобитни ушлашга уринди.
SOHR маълумотларига кўра, тўқнашувлар "баъзи маҳаллий аҳоли ўз уйларини тинтув қилишга рухсат бермаганидан" кейин бошланган. Офицернинг акаси ва қуролланган шахслар полиция йўлини тўсиб, патрул машиналаридан бирига ҳужум қилган, бу эса одамларнинг ўлимига сабаб бўлган, дея хабар беради ташкилот.
