“Алпомиш” спорт саройида ёшлар гала-концерти ўтказилди
Пойтахтда жойлашган “Алпомиш” муз саройида “Тошкент ёшларни севади” ойлиги сарҳисобига бағишланган гала-концерт бўлиб ўтди.
Дастлаб ойлик доирасида ўтказилган тадбирлар, кўрик-танлов ва мусобақалар, уларнинг ОАВда ёритилиши жараёнлари акс этган видео ролик намойиш этилди.
Шундан сўнг, “Орзу” болалар ижодиёти кўрик-танловининг адабиёт, вокал, классика, рақс, чолғу, тасвирий ва амалий санъат йўналиши ғолибларига Тошкент шаҳар ҳокимлиги томонидан диплом, статуетка ва эсдалик совғалари тақдим қилинди.
Шунингдек, Тошкент шаҳрининг турли ҳудудларида фаолият олиб борувчи йилнинг энг фаол ёшлар етакчилари ташаккурнома, хорижга саёҳат, дам олиш масканларига йўлланма ва бошқа хил қимматбаҳо совғалар билан тантанали тақдирланди.
Тақдирлаш маросимидан сўнг ташкил қилинган эстрадамизнинг ёрқин юлдузлари иштирокидаги гала-концерт ёшларга байрамона кайфият улашди.
