Олимлар умрни бир неча йилга қисқартирадиган озиқ-овқатлардан огоҳлантирди
Уларга кўп миқдорда қайта ишланган маҳсулотлар киради. Турли чипслар, алкоголсиз ширин ичимликлар, бургер ва колбаса маҳсулотлари шулар жумласидандир.
Ултра қайта ишланган озиқ-овқатларни мунтазам истеъмол қилиш биологик қаришни тезлаштиради.
Монаш университети (Австралия) олимлари шундай хулосага келишди.
Тадқиқот натижалари Age and Aging журналида чоп этилган ва Medical Express томонидан ҳам эълон қилинган. Ултра қайта ишланган озиқ-овқатлар кўп миқдорда лаззат кучайтиргичлар, консервантлар ва эмулсификаторларни ўз ичига олади.
Бу маҳсулотларга чипслар, алкоголсиз ширин ичимликлар, тез тайёрланадиган овқатлар, музқаймоқ, шоколад, печене, колбасалар, бургерлар, товуқ ва балиқ дудламалари, ширин ёки шўр қадоқланган газаклар киради.
Тадқиқотда АҚШдан 20 ёшдан 79 ёшгача бўлган 16 мингдан ортиқ кишининг маълумотлари ҳисобга олинди. Биологик ёшни баҳолаш учун ДНК метилацияси ва атроф-муҳит таъсирини, шу жумладан овқатланишни ҳисобга оладиган PhenoAge эпигенетик соати ишлатилган.
Натижалар шуни кўрсатдики, диетада ўта қайта ишланган озиқ-овқатларнинг ҳар 10% кўпайиши биологик қаришни 2,4 ойга тезлаштирди.
Бундай озиқ-овқатларни кўп миқдорда истеъмол қилган иштирокчилар (умумий энергия истеъмолининг 100% гача) ўз тенгдошларидан биологик жиҳатдан ўртача 0,86 ёшга катта бўлган. Тадқиқотга раҳбарлик қилган доктор Барбара Кардозонинг таъкидлашича, атиги 200 калория ўта қайта ишланган озиқ-овқат қаришни икки ойга тезлаштириши мумкин.
Тадқиқотчиларнинг таъкидлашича, бундай озиқ-овқатларнинг биологик ёшга салбий таъсири умумий овқатланиш сифати юқори бўлса ҳам сақланиб қолади. Бунинг сабаби бундай озиқ-овқатда озуқа моддаларининг тўлиқ етишмаслиги бўлиши мумкин.
