Пойтахтда ёшларнинг жамоатчилик тузилмаларини тузиш ташаббуслари қўллаб-қувватланмоқда
11 ноябрь куни Тошкент шаҳар ҳокимлиги ташаббуси билан Тошкент талабалар ассоциациясининг биринчи таъсис йиғилиши бўлиб ўтди.
Тошкент талабалар ассоциациясининг биринчи таъсис йиғилишида олий таълим муассасаларининг ёшлар етакчилари, факултет координаторлари, талабаларнинг ўзини-ўзи бошқариш органлари, уюшмалари, ассоциациялари, кенгашлари, ҳаракатлари, гуруҳлари раҳбарларидан иборат 550 нафар делегатлар иштирок этди.
Тадбирда талабалар ичидан ўз ташаббуси билан номзодини қўйган талабгорларнинг бир қатор қизиқарли ва мақсадли режалари тингланди. Хусусан, талабаларнинг илмий изланишларига кўмак бериш, нетwоркинг учун ўқув оромгоҳлари ташкил қилиш, ташаббускор талабалар ўртасида энг яхши лойиҳа муаллифларини тақдирлаш мақсадида “Йил мукофоти”ни жорий қилиш, сўровномалар ўтказиш орқали талабалар муаммоларини ўрганиш ва уларга ечим топишга кўмаклашиш каби мақсадларни ўз олдига қўйган ёшлар фикр-мулоҳазалари барчанинг эътиборини тортди.
Тақдимотлардан сўнг Талабалар ассоциацияси раиси ва унинг турли йўналишлар бўйича ёрдамчилари очиқ овоз бериш йўли орқали сайланди. Якуний натижаларга кўра, 11 нафар ўз ташаббуси билан номзодини қўйган талабалар ичидан Низомий номидаги Тошкент давлат педагогика университети магистранти Отабек Собитов энг кўп овоз йиғган номзод деб қайд этилди ва бир овоздан ассоциация раиси этиб сайланди.
