Ўзбекистонда ҳаво ҳарорати тушиб кетиши кутилмоқда
5-8 ноябр кунлари республика ҳудудига совуқ ва нам ҳаво массалари кириб келади. Баъзи жойларда ҳарорат 3 даража совуққача пасаяди.
Ўзбекистонда ҳаво ҳарорати тушиб кетиши кутилмоқда.
Гидрометеорология хизмати агентлиги томонидан берилган маълумотга кўра, жорий йилнинг 5-8 ноябрь кунлари Ўзбекистон ҳудудига совуқ ва нам ҳаво массалари кириб келиши кутилмоқда.
Ҳаво ҳарорати аста-секин пасаяди ва 7-8 ноябрда кечалари 0-5 даража илиқни, баъзи жойларда 3 даража совуқ, кундуз кунлари 5-10 даража илиқни ташкил этади.
Республиканинг айрим ҳудудларида шамол тезлиги 13-18 м/с гача, шимолда ва чўл ҳудудларда 20-23 м/с гача кучайиши мумкин.
5-6 ноябрь кунлари республика бўйича вақти-вақти билан ёмғир ёғади, тоғларда қорга айланади, баъзи жойларда кучли бўлади.
Ўзбекистоннинг тоғ олди ва тоғли ҳудудларида 5-7 ноябрь кунлари сел-сув тошқин ҳодисалари юзага келиши мумкин.
Республика ҳудуди бўйича ёмғир сувлари тўпланиши эҳтимоли бор, бу эса ҳудудларни сув босишига олиб келиши мумкин.
Шу муносабат билан, Фавқулодда вазиятлар вазирлиги барча фуқаролардан иситиш мосламаларидан фойдаланишда ёнғин ва техника хавфсизлиги қоидаларига қатъий риоя қилишни сўраган.
